Dýman Áýbákirovtiń ornyna Marat Elibaev keldi.
Qazaqstan Damý bankiniń baspasóz qyzmeti bank basqarmasynyń quramy ózgergenin jetkizdi, dep habarlaıdy Almaty-akshamy.kz.
«2022 jylǵy 25 aqpandaǵy «Qazaqstannyń Damý Banki» AQ Dırektorlar keńesiniń sheshimimen Marat Elibaev basqarma tóraǵasynyń orynbasary - QDB basqarmasynyń múshesi bolyp taǵaıyndaldy. Ol áleýetti qaryz alýshylardy izdeý jáne tartý, Damý bankiniń kredıttik saıasatyn júzege asyrý, sondaı-aq banktiń kredıttik portfelin basqarý máselelerine jetekshilik etetin bolady»,- delingen Qazaqstan Damý bankiniń baspasóz qyzmetiniń habarlamasynda.
Marat Elibaev 1984 jyly 2 maýsymda dúnıege kelgen. 2005 jyly T. Rysqulov atyndaǵy Qazaq ekonomıkalyq ýnıversıtetin «Qarjy jáne býhgalterlik esep» mamandyǵy boıynsha úzdik bitirgen. 2004 jyly Halyqaralyq bıznes akademıasynda oqydy, mamandanýy – MBA baǵdarlamasynyń basqarý modýli (kásibı menedjer). 2008-2009 jyldary «Bolashaq» halyqaralyq baǵdarlamasy aıasynda London Business School-da oqý kýrsyn ótti, onda ol Qarjy (korporatıvtik qarjy) magıstri dárejesin aldy. Marat Elibaev sondaı-aq Jáýtikov atyndaǵy respýblıkalyq mamandandyrylǵan fızıka-matematıka mektep-ınternatynyń túlegi bolyp tabylady.
«Marat Elibaev jańa qyzmetinde ókilettigi 2022 jylǵy 25 aqpandaǵy Banktiń DK sheshimimen merziminen buryn toqtatylǵan QDB Basqarma tóraǵasynyń orynbasary Dýman Áýbákirovti almastyrǵanyn atap ótemiz», - delingen baspasóz qyzmetiniń habarlamasynda.
Engizilgen ózgertýlerdi eskere otyryp, bank basqarmasynyń quramy mynadaı bolyp bekitildi:
- Iskakov Rýslan Vıktorovıch - basqarma tóraǵasy;
- Kenjebaeva Sandýǵash Aıbasqyzy - basqarma tóraǵasynyń orynbasary;
- Ábisheva Botagóz Toqtaǵulqyzy - basqarma tóraǵasynyń orynbasary;
- Sháripov Áset Bolatuly - basqarma tóraǵasynyń orynbasary.
«Qazaqstannyń Damý Banki» AQ (QDB) - Qazaqstan ekonomıkasynyń shıkizattyq emes jáne ınfraqurylymdyq sektorlaryn jańǵyrtý jáne damytý boıynsha 2001 jyly qurylǵan ulttyq damý ınstıtýty. Qyzmetiniń negizgi baǵyttary: óndiristik ınfraqurylymdy jáne óńdeýshi ónerkásipti damytý, el ekonomıkasyna syrtqy jáne ishki ınvestısıalardy tartý jáne qoldaý kórsetý. QDB - ındýstrıalyq-ınnovasıalyq damý memlekettik baǵdarlamasynyń iri ınvestısıalyq operatorlarynyń biri. QDB «Báıterek» ulttyq basqarýshy holdıńi» AQ qurylymyna kiredi.