Búgin qalyń qazaq jurty aıtýly aqyn, Qazaqstannyń eńbek sińirgen qaıratkeri Nesipbek Aıtulyn aqtyq saparǵa shyǵaryp saldy. Arda azamatpen qoshtasý rásimi Astanadaǵy Áziret Sultan meshitinde ótti, dep habarlaıdy almaty-akshamy.kz.
Qaraly jıynǵa marqumnyń kózin kórgen áriptesteri, dos-jaqyndary men týǵan-týystary jınaldy. Sanaýly ǵumyrynda oqyrmannyń sheksiz súıispenshiligine bólengen aqyndy el-jurty qımastyqpen shyǵaryp saldy.
Nesipbek Aıtulynyń qazasy kóptiń qabyrǵasyn qaıystyryp ketti. Qalamger aýyr dertpen arpalysyp, aqyry máńgilik mekenine kete bardy. Jalyn ǵumyr erte sóngenimen, sóz zergeriniń artynda óshpes izi qaldy. «Saryjaılaýym, Ánjaılaýym» dep qalam terbegen aqyn shuraıly da, shyraıly Shubartaý óńirinde ómirge kelgen. Tańǵajaıyp Tarbaǵataıdyń tasynda kindigi kesilip, tal besiginde terbelip ósti.
– Daryndy, talantty, aqynnyń ómirden ótýi – halqymyzdyń rýhanıaty, urpaǵy úshin orny tolmaıtyn úlken qasiret. Nesaǵań ómirde de, ónerde de, ádebıette de óte bıikte boldy. Aıtmatovtyń «sen bıiksiń» deıtin. Nesipbek kókemiz – bıik aqyn, azamat, tulǵa! – dedi QR eńbek sińirgen ártisi, kınorejısser Talǵat Temenov.
Adal eńbek, adal qyzmet. Arda uldy ataq-abyroıdan da kem qylmady. Memlekettik syılyqtyń laýreaty, Qazaqstannyń eńbek sińirgen qaıratkeri, «Parasat», «Barys» ordenderin keýdesine jarqyraı taqty. Basty marapat - týǵan eldiń yqylasy. Kúni keshe Memleket basshysy da qazaǵa qaıǵyryp kóńil aıtty. Táýelsizdik jyrshysyna aınalǵan aqynnyń tartymdy týyndylary oqyrmandar tarapynan joǵary baǵalanǵanyn jetkizdi. Aqtyq saparynda kópshilik qalamgerdi «Qarapaıymdylyqtyń, adamdyqtyń týyn jyqpady» dep eske aldy.
– Jalǵyz ǵana aqyn emes, adam retinde qatty syılaıtyn. Úıretetin. On alty jasymda aǵam bolyp jolyqqan, ómirdiń aıaǵyna deıin jaqsylyqqa jetelegen meıirimdi adam edi. Men óte qýanyshty kúnderimdi sol kisimen ótkizdim. Onyń syılyq alǵan, elge tanylǵan shaqtarynda birge boldyq, – dedi alyqaralyq «Alash» ádebı syılyǵynyń laýreaty Myltyqbaı Erimbetov
Nesipbek Aıtulynyń atasy, ákesi de aqynjandy adam bolǵan. «Qara óleńniń shekpenin kıgen» ul osydan soń baba izin jalǵastyrdy. Júreginiń túbinen súzip, tunyǵynan alǵan tujyrymdaryn jazba kitap qyp jazdy. Nebári 23 jasynda tuńǵysh kitabyn jaryqqa shyǵaryp úlgergen. «Áke týraly syr», «Jańbyr áni», «Túndelep ushqan tyrnalar», «Rýhymnyń padıshasy» syndy aýdarmalardyń avtory. Túrik, Qytaı, fransýz aqyndarynyń óleńin týǵan tilimizde sóıletken.