El Táýelsizdiginiń 30 jyldyǵyna oraı ál-Farabı atyndaǵy Qazaq ulttyq ýnıversıtetinde «Qazaq Eliniń jańa dáýiri» atty halyqaralyq ǵylymı-tájirıbelik konferensıa ótti.
Aıtýly sharaǵa memleket jáne qoǵam qaıratkerleri, QR Senaty men Májilis depýtattary, Almaty qalasy ákimdiginiń jáne qoǵamdyq uıymdardyń ókilderi, tarıhshy ǵalymdar men sarapshylar, Almaty qalasy ákiminiń orynbasary Erjan Babaqumarov qatysty.
Konferensıanyń ashylýynda QR Parlamenti Senatynyń tóraǵasy Máýlen Áshimbaevtyń Quttyqtaý hatyn QR Parlamenti Senatynyń áleýmettik-mádenı damý jáne ǵylym komıtetiniń tóraǵasy Murat Baqtıaruly oqydy. Hatta: «Táýelsizdigimizdiń 30 jyldyǵyna baılanysty is-sharalar halyqqa rýhanı serpilis ákelýi qajet. Bul tarıhı datanyń máni men mańyzyn halyqqa túsindirý, ashyp kórsetý óte mańyzdy. Osy turǵydan alǵanda, «Qazaq Eliniń jańa dáýiri» atty halyqaralyq ǵylymı-praktıkalyq konferensıanyń bereri mol», – delingen. Qýǵyn-súrginge toly náýbetti jyldardyń, asharshylyqtyń aýyr zardaptary týraly aıtqan spıker, táýelsizdik alǵannan keıin elimizde bul baǵytta aýqymdy jumystar júrgizilgenin tilge tıek etti.
«Ótken ǵasyrdyń alǵashqy jartysynda qazaq halqynyń basynan asa aýyr náýbet jyldar ótkeni tarıhı shyndyq. Derekterde kórsetilýinshe, eki retki ashtyqta halqymyzdyń teń jartysynan astamy qurban boldy. Tarıhshylarymyz asharshylyqqa ushyramasaq, osy kúnde 40–50 mıllıon bolar edik degen boljam jasaıdy. Osydan-aq qyzyl ımperıanyń qolymen jasalǵan asharshylyqtyń qanshalyq aýyr bolǵanyn ańǵarýǵa bolady», – dedi Murat Baqtıaruly.
Konferensıa barysynda QR Parlamenti Májilisiniń depýtaty Juldyz Súleımenova onlaın qosylyp, «Táýelsizdik tuǵyryn nyǵaıtýda QazUÝ-dyń úlesi zor. Otandyq ǵylym, bilim salasynyń bilikti kadrlary egemen elimizdiń kemel keleshegin qalyptastyrýǵa eleýli úles qosyp keledi», – dedi. Jıynǵa qatysýshylar Qazaqstannyń álemdik qaýymdastyqtaǵy alatyn orny men mańyzyn, syrtqy saıası qatynastarynyń qalyptasý úderisi týraly keleli oılaryn ortaǵa saldy.
«Táýelsizdik – bul bizdiń halqymyzdyń eń basty qundylyǵy jáne eń mańyzdy baılyǵy. Táýelsizdigimizdi kózdiń qarashyǵyndaı saqtaý – Otanymyzdyń árbir azamatynyń asa mańyzdy mindeti ári qasıetti boryshy. Búgingi bilim berý salasynda ál-Farabı atyndaǵy Qazaq ulttyq ýnıversıtetiniń alar orny erekshe. Bilimniń qara shańyraǵy QS jahandyq reıtıńte 165-orynda tursa, ulttyq reıtıńterde kósh basynda keledi. Bilim men ǵylymdy ushtastyryp otyrǵan oqý ordasy aldaǵy ýaqytta da sapaly bilim men tárbıe berý baǵytyndaǵy mańyzdy da mazmundy jobalaryn júzege asyra beredi degen senimdemin», – dedi Almaty qalasy ákiminiń orynbasary Erjan Babaqumarov.
Konferensıa sońynda Qazaqstannyń álemdegi orny men róliniń halyqaralyq deńgeıde zerttelýine jańa serpin beriletini belgili boldy.