200-den astam eldi mekende medısınalyq obektiler joq.
Aýyldaǵy medısınalyq ınfraqurylymnyń shamamen 50%-y tozǵan. Bul týraly QR Densaýlyq saqtaý mınıstri Ajar Ǵınıat aıtyp berdi, dep habarlaıdy Almaty-akshamy.kz QazAqparatqa silteme jasap.
«Memleket basshysynyń tapsyrmasymen aýyldaǵy obektilerge ınventarızasıa júrgizildi, nátıjesinde 200-den astam eldi mekende medısınalyq obektiler joq, 400-ge jýyq medısınalyq obekti jaldamaly, apatty nemese beıimdelgen ǵımarattarda ornalasqan», - dedi mınıstr Úkimettiń búgingi otyrysynda.
Ajar Ǵınıattyń aıtýynsha, aýyldaǵy medısınalyq-sanıtarlyq alǵashqy kómektiń medısınalyq ınfraqurylymy 50%-y tozǵan.
Sonymen birge, el halqyna, onyń ishinde aýyl turǵyndaryna medısınalyq-sanıtarlyq alǵashqy kómektiń qoljetimdiligin arttyrý úshin bıyl densaýlyq saqtaý uıymdary jelisiniń jańa memlekettik normatıvi bekitildi.
Osylaısha, 50 adamǵa deıingi aýyldarda meıirger medısınalyq kómekti úı-jaısyz júzege asyrady, al 500 adam turatyn aýyldarda medısına qyzmetkerleriniń sany bir adamnan úshke deıin ulǵaıyp, feldsherlik-akýsherlik pýnktter ashýǵa bolady.
«Ambýlatorıalyq dári-dármekpen qamtamasyz etýge kirmeıtin dárilerdiń qoljetimdi etý úshin salalyq zańnamaǵa aýyldyq medısınalyq uıymdarda dárihana pýnktterin qurý jónindegi norma engizildi. Bıylǵy shilde aıynan bastap 230 eldimekende 75 memlekettik jáne 161 jeke dárihana ashyldy», - dedi Ajar Ǵınıat.
Buǵan deıin Densaýlyq saqtaý mınıstri aýyl turǵyndarynda jıi kezdesetin aýrýlardy ataǵan edi.