Bolashaqta Ábdijámil Nurpeıisov atyndaǵy keremet oqý zalynda shyǵarmashylyq jáne poezıa keshteri uıymdastyrylatyn bolady.
Mádenıet jáne sport mınıstrligi, Ulttyq akademıalyq kitaphanasy Altyn Qyran Foundation qoǵamdyq qorynyń uıymdastyrýshylyq-qarjylyq qoldaýymen qazaq ádebıetiniń abyzy Ábdijámil Nurpeıisov atyndaǵy zal ashyldy, dep habarlaıdy Almaty-akshamy.kz
«Aıqyn» basylymynyń habarlaýynsha, jıyn barysynda «Á.Nurpeıisov shyǵarmashylyǵy jáne álemdik ádebı úderis» atty halyqaralyq onlaın konferensıa uıymdastyryldy.
«Onyń bir ǵana «Qan men ter» trılogıasy men «Sońǵy paryz» dılogıasy kúlli qazaq ádebıetiniń tabysy desek qatelespeımiz. Ózderińizge málim, «Qan men ter» trılogıasy 30-dan astam shet tilderine aýdaryldy, dál osy shyǵarmanyń jelisi boıynsha 2 bólimnen turatyn kınotýyndy túsirilgen. Ol – Aral teńiziniń tartylyp bara jatqanyna alǵash bolyp qabyrǵasy qaıysyp, «Sońǵy paryz» romany arqyly Aral ekologıasyna dúnıe júzi qaıratkerleriniń nazaryn aýdartqan qazaq qalamgerleriniń aqsaqaly. Jazýshy Á.Kekilbaıuly bul shyǵarmany ulttyq prozamyzdaǵy oqshaý qubylysqa, jańa ádebıetimizdiń jańa arnasyn salyp beretin alǵashqy muz jarǵyshqa teńedi», -dedi jıynda sóz alǵan Mádenıet jáne sport mınıstri Aqtoty Rahmetollaqyzy.
Zaldy ashýdaǵy maqsaty – Ábdijámil Nurpeıisovtiń shyǵarmashylyq murasyn, jınaǵan kitaphanasyn elge tanystyrý, kitap jáne kitap oqýdy ilgeriletý, kitaphananyń ımıjin kóterý.
Sondaı-aq, qalamgerdiń shyǵarmashylyq murasyn zertteı otyryp, qazaq klasıkalyq jáne qazirgi zamanǵy ádebı shyǵarmalardy jastardyń oqýyna yqpal etý, oqý mártebesin kóterý, kitaphanaǵa oqyrman tartý, oqý mádenıetin damytý jáne jas urpaqtyń zıatkerlik deńgeıin arttyrý men rýhanı tanymyn baıytý.