Memleket basshysy Ońtústik Koreıanyń isker top ókilderimen ótken dóńgelek ústelden keıin osy eldiń iri kompanıalarynyń basshylarymen – «Samsung Electronics» kompanıasynyń prezıdenti In Óng Lı jáne «Doosan Heavy Industries & Construction» prezıdenti Óng Ing Chongpen ekijaqty kezdesýler ótkizdi dep habarlaıdy almaty-akshamy.kz akorda.kz silteme jasap.
Qazaqstan Prezıdenti In Óng Lımen kezdesýde «Samsung Electronics» kompanıasynyń sıfrlyq ınovasıalar salasynda álemdegi jetekshi orynda ekenin atap ótip, sıfrlandyrý, ınovasıa men ǵylym arqyly tehnologıalyq damý týraly máselelerge toqtaldy.
Qasym-Jomart Toqaev yntymaqtastyqtyń perspektıvaly baǵyttary «aqyldy qalalar» júıesin engizý ekenin aıtyp, Qazaqstan kólik qatynastaryn basqarý, jol-kólik oqıǵalarynyń aldyn alý, derekterdi qashyqtan jiberý tehnologıalaryn engizýge múddeli dedi.
Budan keıin Memleket basshysy «Doosan Heavy Industries & Construction» prezıdenti Óng Ing Chongpen kezdesip, Qazaqstan ekonomıkasynyń damýyna qosqan úlesi úshin rızashylyǵyn bildirdi.
– Atyraý oblysynda qýaty 310 MVt gaztýrbınalyq elektr stansasynyń qurylysyn sátti júzege asqan joba retinde atap ótkim keledi. Ońtústik Koreıanyń jasyl energetıkany damytýdaǵy álemdik kóshbasshylardyń biri bolýǵa umtylatyn, sýtegi óndirisiniń aıtarlyqtaı úlesi bar jospary týraly jaqsy bilemiz. Qazirgi ýaqytta Koreıanyń 3 qalasyn sýtegi energıasyna kóshirý josparyna daıyndalyp jatyrsyzdar. Búginde Qazaqstanda da balamaly energıa kózderin damytýǵa erekshe kóńil bólinýde. Biz 2030 jylǵa qaraı balamaly energıanyń 30 paıyzyna qol jetkizýdi josparlap otyrmyz, onyń 15 paıyzy jańartylatyn energıa kózderi bolmaq.
Osy maqsatta jýyq arada 3-4 gıgavatt elektr energıasyna jańartylatyn energıa kózderiniń jobalaryn júzege asyrýdy josparlap otyrmyz. Sondyqtan sizderdiń usynystaryńyz biz úshin óte paıdaly bolady, – dedi Qazaqstan Prezıdenti.
Qasym-Jomart Toqaev kompanıanyń energetıkalyq jobalardaǵy kóp jyldyq tájirıbesi men biliktiligin eskere otyryp, olardy qazaqstandyq jylý-energıa ortalyqtaryn jańǵyrtý jáne «Qarabatan» keshenin keńeıtý boıynsha yntymaqtastyqqa shaqyrdy.
Óz kezeginde, koreılik kompanıa ókili balamaly energıa kózderi boıynsha ortaq jobalarda jumys isteýge daıyn ekenin jetkizdi.