Qoınaýy qara altynǵa toly aımaq.
Búgin Prezıdent Qasym-Jomart Toqaevtyń Atyraý oblysyna jumys sapary barysynda Atyraý oblysy jurtshylyǵymen kezdesti, dep habarlaıdy Almaty-akshamy.kz Aqordanyń baspasóz qyzmetine silteme jasap.
«Búgin sizdermen shejiresi baı, qazynasy mol Atyraý jerinde kezdesip otyrǵanyma qýanyshtymyn. Qoınaýy qara altynǵa toly bul aımaq elimizdiń ekonomıkasynyń damýyna eleýli úles qosýda. Aq Jaıyqtyń atyraby árdaıym Qazaqstannyń ekonomıkalyq tiregi bolyp keledi. Shyn máninde, táýelsiz el retinde aıaqqa nyq turýymyzǵa Atyraý turǵyndarynyń róli mańyzdy boldy. Búginde munaıdyń baǵasy edáýir joǵary tur. Osydan 20 jyldan astam ýaqyt buryn men Úkimet basqarǵan kezde munaıdyń baǵasy 10-15 dollar edi. İri ken oryndary ıgerilmegen, zamanaýı tehnologıa kele qoımaǵan shaq bolatyn. Munaıdy eksporttaý joldary shekteýli, óte qıyn zamandy bastan ótkerdik»,- dedi Prezıdent.
Aımaq halqy qazir de memleketimizdi nyǵaıtýǵa, halyqtyń ál-aýqatyn arttyrýǵa zor úles qosyp jatyr.
«Sol úshin ózderińizge shynaıy rızashylyǵymdy bildiremin. Bul óńirde munaıshylyq baıyrǵy kásipke aınalǵan. Qazaq munaıynyń atasy atanǵan Safı Ótebaevtyń jolyn izbasarlary laıyqty jalǵastyryp keledi», - dedi Qasym-Jomart Kemeluly.