Qasym-Jomart Toqaev bıyl 13-15 qyrkúıekte elordamyzda Álemdik jáne dástúrli dinder kóshbasshylarynyń jetinshi sezi ótetinine toqtalyp, Birikken Ulttar Uıymynyń qoldaýyna alǵysyn bildirdi, dep habarlaıdy Almaty-akshamy.kz.
Qasym-Jomart Toqaev Abdýlla Shahıdke iltıpat bildire otyryp, Qazaqstan men BUU arasyndaǵy yqpaldastyqty odan ári keńeıtý jolynda onyń bul saparynyń mańyzdy ekenin atap ótti.
Prezıdent jahandyq beıbitshilikti, qaýipsizdik jáne turaqty damýdy qamtamasyz etýdegi Dúnıejúzilik uıymnyń aıryqsha rólin atap ótti. Sonymen qatar Abdýlla Shahıdtiń BUU Bas Assambleıasynyń tóraǵasy laýazymyndaǵy belsendi qyzmetin joǵary baǵalady.
«BUU Bas Assambleıasynyń 77-sessıasy – barsha adamzat úshin eń qajetti sheshimderdi usyný maqsatymen basshylardyń syndarly jaǵdaıda bas qosýy úshin biregeı múmkindik. Biz osy mańyzdy is-sharany nátıjeli ótkizý úshin Sizdiń qosyp otyrǵan úlesińizdi qurmetteımiz», – dedi memleket basshysy.
Óz kezeginde BUU Bas Assambleıasynyń 76-sessıasynyń tóraǵasy elimizge, Ortalyq Azıaǵa alǵash ret kelgenin aıtyp, Qazaqstan men BUU arasyndaǵy 30 jyldyq kezeńdegi kópjosparly áriptestiktiń deńgeıine kóńili tolatynyn jetkizdi. Sondaı-aq Qazaqstan prezıdentiniń bastamasymen elimizde júzege asyrylyp otyrǵan aýqymdy reformalardy, Konstıtýsıaǵa ózgerister engizý boıynsha ótken referendýmdy joǵary baǵalady.
Qasym-Jomart Toqaev bıyl 13-15 qyrkúıekte elordamyzda Álemdik jáne dástúrli dinder kóshbasshylarynyń jetinshi sezi ótetinine toqtalyp, Birikken Ulttar Uıymynyń qoldaýyna alǵysyn bildirdi.
Abdýlla Shahıd Álemdik jáne dástúrli dinder kóshbasshylarynyń jıynyn mańyzdy alań dep atap, sıeziń mártebesin joǵary baǵalady. Onyń aıtýynsha, álem elderinde kóp jaǵdaıda túsinbestik adamdardyń nanym-senimine qaraı kemsitýinen týyndap jatady. Sondyqtan BUU Bas Assambleıasynyń tóraǵasy dinı kóshbasshylardyń jetinshi sezinde rýhanı jetekshilerdiń álemdik beıbitshilikti nasıhattaýy negizgi messedj bolatynyna senetinin jetkizdi.