Memleket basshysy Qasym-Jomart Toqaev Qazaqstan halqyn Táýelsizdik kúnimen quttyqtady, dep habarlady Almaty-akshamy.kz Inform.kz-ke silteme jasap.
Memleket basshysy Qasym-Jomart Toqaevtyń Táýelsizdik kúnimen quttyqtaýy
Qurmetti otandastar!
1991 jylǵy 16 jeltoqsan – tól tarıhymyzdaǵy mereıli beles. Bul – egemen el bolýdy ańsaǵan ata-baba armany aqıqatqa aınalǵan uly kún.
Táýelsizdik kúniniń aıryqsha mán-maǵynasy bar. Azattyq úshin arpalysqan ult perzentterin el jadynda máńgi saqtaý – qasıetti paryzymyz. Olardyń otanshyldyq qasıeti – búgingi jáne bolashaq urpaqqa árdaıym úlgi-ónege.
Biz tamyry tereń memlekettigimizdiń mańyzdy belesterin ulyqtap, ultty uıystyratyn ortaq qundylyqtardy nyǵaıta beremiz. Sol arqyly qasterli Táýelsizdigimizdiń tuǵyryn bıiktete túsemiz.
Táýelsizdik – baǵa jetpes baılyq. Bárimiz ony kózdiń qarashyǵyndaı saqtaýymyz kerek. Memleketimizdiń egemendigin, elimizdiń amandyǵy men jerimizdiń tutastyǵyn qorǵaý – ár azamattyń qasterli boryshy.
Bıyl elimiz úshin betburysty jyl boldy. Buryn-sońdy bolmaǵan syn-qaterlermen betpe-bet keldik. Eldigimizge ishten de, syrttan da zor qaýip tóndi. Degenmen myzǵymas birlik pen yrys-yntymaqtyń arqasynda barlyq qıyndyqty eńserip kelemiz.
Biz aýqymdy saıası jáne ekonomıkalyq reformalardy qolǵa alyp, memleketimizdi jańǵyrtýdyń jańa kezeńine qadam bastyq. Bul bastamalardy tabysty júzege asyrý – árqaısymyzdyń qolymyzda.
Egemen elimizdi odan ári damytý – aldymyzda turǵan basty mindet. Biz osy jolda aıanbaı eńbek etýimiz qajet. Sonda ǵana Qazaqstan qýatty memleketke aınalady.
Barshańyzdy búgingi ulyq merekemen shyn júrekten quttyqtaımyn!
Sizderge zor densaýlyq, baq-bereke tileımin! Qazaqstanymyz órkendeı bersin! Qasıetti Táýelsizdigimiz máńgi bolsyn!