Qazaqstandyqtar 12 mamyrdan bastap rejıser Aqan Sataevtyń «Uly dala tańy» tarıhı dramasyn kınoteatrlardan kóre alady.
Tarıhı kınotýyndy Qazaq handyǵynda Jánibek hannyń uly – Qasym han bılik etken kezderi týraly baıandaıdy. Dál osy jyldary Qazaq handyǵy órkendep qana qoımaı, Shyǵys Deshti-Qypshaqtyń keń aýmaǵyna baqylaý ornatylyp, qazaqtar derbes etnıkalyq qaýymdastyq retinde bizdiń aýmaqtan tys jerlerge de belgili boldy, dep habarlaıdy Almaty-akshamy.kz QazAqparatqa silteme jasap.
Qasym han ádet-ǵuryptyq zańdarǵa arqa súıep, tarıhqa «Qasym hannyń qasqa joly» degen atpen engen ózi daıyndaǵan konstıtýsıalyq qujattyń kómegimen el basqardy. Tarıhı kınotýyndynyń senarıin belgili kınodramatýrg Bekbolat Shekerov, Nazıra Baqaeva jáne Aqan Sataev jazdy.
Qasym hannyń jas kezin Danıar Orazaev oınaıdy, Eresek Qasym han – Berik Aıtjanov, Jas Buryndyq han – Aıdos Abdyqadyrov, Eresek Buryndyq han – Erik Joljaqsynov. Muhammed Shaıbanı – Nurlan Álimjanov. Jahan begimniń jas kezin Altynaı Nógerbek, Egde Jahan begimdi Shámshagúl Mendıarova oınaıdy. Álı Rashıdtiń jas kezin – Qýanysh Qudaıbergen, Eresek Álı Rashıdti – Tuńǵyshbaı Jamanqulov somdaıdy.
«Tarıhı fılmdi túsirýge 2500 adam tartyldy. Olardyń árqaısysy óz jumysyna úlken jaýapkershilikpen qarady. Bizdiń keńesshi-tarıhshylarymyzdyń aıtýynsha, bul ǵylymı jumysqa uqsas bolǵan. Barlyq tarıhı málimetter, faktiler ekranda kórsetiledi. 14 ǵasyr bizdiń halqymyzdyń irgeli kezeńi ekeni belgili», - dedi Aqan Sataev.
Fılmniń túsirý jumystary 2021 jyly aqpan aıynyń sońynda Almaty oblysy Panfılov aýdanynda bastalǵan bolatyn. Naýryzdyń ortasynda túsirilimder «Qazaqfılm» kınostýdıasynyń pavılondarynda turǵyzylǵan «Syǵanaq qalasy», «Buryndyq hannyń taq zaly» jáne «Samarqand – Shaıbannyń aýlasy» dekorasıalarynda júrgizildi.
Jaz aılarynda Qapshaǵaı qalasynyń mańynda kúrdeli sahnalardyń biri – Ulytaýdaǵy shaıqas túsirildi. Bul sahnaǵa Nomad Stunts kaskaderler toby arnaıy tartyldy. Fılmniń trúkterin Jaıdarbek Kúnǵojınov, Esbolat Ábdiberik jáne Ádilet Aqmatov oryndady.