29 birlik áskerı avtokólik jáne ınjenerlik tehnıka tartyldy
Tótenshe jaǵdaılar mınıstrliginiń málimetinshe, Reseıdiń Altaı ólkesinde qýraǵan shóptiń tutanýynan bastalǵan órt Abaı oblysyndaǵy «Semeı ormany» tabıǵı rezervatyna taraǵan. Órttiń jalpy aýdany 1500 ga qurady, dep habarlaıdy Almaty-akshamy.kz.
Qorǵanys mınıstri, general-polkovnık Rýslan Jaqsylyqovtyń nusqaýy boıynsha órtke qarsy sharalardy oryndaýǵa arnaıy daıyndyǵy bar «Shyǵys» óńirlik qolbasshylyǵynyń kelisimshart boıynsha júzden asa ofıseri men áskerı qyzmetshisi jumyldy.
Sonymen qosa 29 birlik áskerı avtokólik jáne ınjenerlik tehnıka (ámbebap jol mashınalary jáne basqa da órt sóndiretin quraldar) tartyldy.
Aýdandy barlaý, sondaı-aq órtti tikeleı sóndirý arnaıy aspamen 3,5 tonna sý tasıtyn «Bembı» qurylǵysymen jabdyqtalǵan Mı-17 kóliktik-jaýyngerlik tikushaǵy arqyly júzege asyrylýda.
Jeke quram orman órtiniń eki oshaǵyn sóndirýmen aınalysýda.
Birinshisinde, oqshaýlanǵan ýchaskede jumys júrgizilýde, ekinshisinde, qashyqtaǵy jerde qorǵanys jelisi qurylýda.
Áskerı qyzmetshiler arnaıy tehnıkamen aǵashtardy qulatyp, úıindiler salý ústinde.
Órt sóndirý jumystary «Shyǵys» óńirlik qolbasshylyǵynyń tyldyq qamtamasyz etý basqarmasy shtabynyń bastyǵy, polkovnık Erjan Esenbaevtyń basshylyǵymen júrgizilip jatyr.
Qarýly Kúshterdiń bólimsheleri jedel shtabpen udaıy baılanysta.