Anasy shamamen eki saǵat buryn úı jaǵdaıynda bosanǵan
Qaraǵandy qalasynda úılerdiń aýlasynan jańa týǵan shaqalaq tabyldy, dep habarlaıdy Almaty-akshamy.kz.
Qaraǵandy qalalyq Polısıa basqarmasyna qarasty Ortalyq polısıa bólimine qaladaǵy aýrýhanalardyń birine jańa týǵan er bala jetkizilgeni týraly habarlama tústi. Ol kópqabatty úılerdiń aýlasynan qorap ishinen tabylǵan. Oqıǵa ornyna shuǵyl túrde jedel-tergeý toby bardy. Oqıǵa kýágeri 21 jastaǵy turǵynnyń aıtýynsha, keshkilik ýaqytta úıinen shyǵyp bara jatqanda aýladaǵy oryndyqta turǵan karton qorabty kórgen. İshinde kórpeshege oralǵan sábı bolǵan. Ol náresteni jaqyn mańdaǵy aýrýhanaǵa jetkizgen. Dárigerlerdiń sózinshe, anasy shamamen eki saǵat buryn úı jaǵdaıynda bosanǵan.
«Náreste merziminen buryn dúnıege kelgendikten, jaǵdaıy ázirge aýyr. Qazirgi ýaqytta bala perınataldyq ortalyqta dárigerlerdiń baqylaýynda», – dep habarlady Qaraǵandy oblysy Polısıa departamentiniń baspasóz qyzmetinen.
Jedel-izdestirý is-sharalary barysynda polısıa qyzmetkerleri balanyń 23 jastaǵy anasyn anyqtap ustady. Jas ana oblys turǵyny ekeni belgili boldy. Atalǵan fakti polısıada tirkeldi. Tergeý amaldary júrgizilip jatyr.