Aýyr jáne asa aýyr qylmystar jasaǵan adamdarǵa jaza merzimi qysqartylýy múmkin
Bas prokýratýra «Raqymshylyq jasaý týraly» zań jobasy boıynsha retteýshilik saıasattyń konsýltatıvtik qujatyn daıyndady, dep habarlaıdy Almaty-akshamy.kz.
«Qańtardaǵy oqıǵalar» boıynsha is júrgizýde 391 qylmystyq is bar (raqymshylyq jasaýǵa jatatyndar).
«Olar boıynsha 383 kúdikti, aıyptalýshy bolyp ótýde. (bultartpaý sharalary boıynsha: eshqaıda ketpeý týraly qolhat – 153, kúzetpen ustaý – 147 adam, úıqamaqqa alý – 24, kepil – 19, jeke kepilgerlik – 2, bultartpaý sharasy tańdalmady – 28, izdeýde – 10). Sottyń is júrgizýinde 102 adamǵa 36 is bar. Sottalǵandar-1 035, onyń ishinde bas bostandyǵynan aıyrý oryndarynda jazasyn óteýshiler-93; probasıada-930; 3 aıyppul taǵaıyndaldy; qoǵamdyq jumystar-9; túzeý jumystary-0», - delingen qujatta.
Qylmystyq teris qylyqtar jáne onsha aýyr emes, aýyrlyǵy ortasha, aýyr jáne asa aýyr qylmystar jasaǵan adamdarǵa, olardyń sottylyǵyn alyp tastap, raqymshylyq jasaý kózdelgen.
Qylmystyq teris qylyqtar men onsha aýyr emes jáne aýyrlyǵy ortasha qylmystar jasaǵan adamdardy qylmystyq jaýaptylyqtan tolyq bosatý usynylady. Aýyr jáne asa aýyr qylmystar jasaǵan adamdarǵa jaza merzimi qysqartylýy múmkin.
«Zań jobasynyń kúshi memleketke opasyzdyq jasaýǵa baılanysty qylmystar jasaǵan; jappaı tártipsizdikterdi, sybaılas jemqorlyq qylmysty, terorıstik qylmysty, ekstremıstik qylmysty, azaptaýdy uıymdastyrǵan, sondaı-aq qylmystardyń qaıtalanýy nemese qylmystardyń qaýipti qaıtalanýy kezinde jaza taǵaıyndalǵan adamdarǵa qoldanylmaıdy», - delingen qujatta.
Memleket basshysy Joldaýynda ereýilge qatysqandar sot ádil ótetinine úmittenip otyrǵanyn aıtqan bolatyn.
Bizge el birligi aýadaı qajet. Ereýilge qatysqandar da, kúshtik qurylym qyzmetkerleri de – óz azamattarymyz. Olar sot ádil ótedi dep qana emes, qoǵam keshirimdi bolady dep úmittenip otyr. Memleket qańtar oqıǵasyna qatysqan, biraq aýyr qylmys jasamaǵan azamattardyń jazasyn jeńildetti. Zań buzǵandardyń birqatary kinásin túsinip, ótken iske ókinip otyr. Olarǵa keshirimmen qaraǵan durys dep oılaımyn.
«Sondyqtan, men qańtar oqıǵasyna qatysýshylarǵa bir rettik raqymshylyq jarıalaý týraly sheshim qabyldadym. Raqymshylyq jappaı tártipsizdikti uıymdastyrýǵa qatysy bar adamdarǵa, sondaı-aq, memleketke opasyzdyq jasaǵany jáne bılikti kúshpen basyp alýǵa árekettengeni úshin aıyptalǵandarǵa qoldanylmaıtyny túsinikti. Sondaı-aq, lańkestik jáne ekstremıstik qylmys jasaǵandarǵa, resıdıvıserge, jurtty azaptaǵandarǵa raqymshylyq bolmaıdy. Biz adamgershilik tanyta otyryp, osy qaıǵyly oqıǵadan tıisti qorytyndy jasaımyz. Mundaı jaǵdaı endi eshqashan qaıtalanbaıdy. Buǵan jol bermeımiz», - degen edi Prezıdent.