Almaty qalalyq polısıa departamentiniń basshysy Qanat Taımerdenov lańkesterdiń qolynan qaza tapqan polısıa serjanty Alen Asylhanov, polısıa starshınasy Rınat Qambetov pen polısıa kishi serjanty Nurbolsyn Almasovtyń otbasyna baryp kóńil aıtty, dep habarlaıdy almaty-akshamy.kz QazAqparatqa silteme jasap.
Qanat Taımerdenovtyń aıtýynsha, olar Almaly aýdandyq PB janyndaǵy polısıa bóliminiń ákimshilik ǵımaratyna jáne strategıalyq mańyzy bar nysanǵa jasalǵan shabýylǵa toıtarys berý kezinde qaza tapty.
«Lańkestermen kúreste qaza tapqan áriptesterimizdiń týystarymen birge qaıǵyramyz. Olar azamattardyń qaýipsizdigi úshin janyn qıǵan naǵyz batyrlar. Nurbolsyn Almasov, Rınat Qambetov jáne Alen Asylhanovtyń erligi, Otan aldyndaǵy janqıarlyq qyzmeti bizge de, bolashaq urpaqqa da jarqyn úlgi bolmaq. Máńgilik estelik», - dedi, Qanat Taımerdenov.
- polısıa serjanty Asylhanov Alen Muhıtuly, 1993 jyly týǵan, ishki ister organdarynda 2015 jyldan beri qyzmet etken, úılengen, bir jasar uly bar.
- polısıanyń kishi serjanty Almasov Nurbolsyn Ǵanıuly, 1994 jyly týǵan, ishki ister organdarynda 2021 jyldan beri qyzmet etken, úılenbegen.
- polısıa starshınasy Qambetov Rınat Talǵatuly, 1988 jyly týǵan, ishki ister organdarynda 2010 jyldan beri qyzmet etken, úılengen, eki ul tárbıelep otyrǵan.
Lańkestik áreketterdiń jolyn kesý, sondaı-aq, memlekettik organdardyń ákimshilik ǵımarattary men strategıalyq nysandaryna jasalǵan qarýly shabýyldardy toıtarý nátıjesinde barlyǵy Almaty polısıasynyń 3 qyzmetkeri qaza tapty, taǵy 176 saqshy jaraqat aldy, onyń 8-iniń jaǵdaıy aýyr.