QR Parlamenti Senaty Tóraǵasynyń orynbasary Olga Perepechına Soltústik Qazaqstan oblysynyń turǵyndarymen kezdesti, dep habarlaıdy Almaty-akshamy.kz Egemen.kz-ke silteme jasap.
Senator jumys sapary barysynda Prezıdenttiń konstıtýsıalyq reformalaryn talqylaýǵa jáne aǵymdaǵy jyldyń 5 maýsymynda ótetin respýblıkalyq referendýmnyń mańyzyna erekshe nazar aýdardy.
«Konstıtýsıany búkilhalyqtyq referendým arqyly ózgertý – ol Prezıdenttiń halyqqa jáne onyń erik-jigerine degen seniminiń aıqyn kórinisi. Referendým árbir azamatqa el taǵdyryn sheshýge qatysýǵa múmkindik beredi jáne jan-jaqty demokratıalandyrý men Jańa Qazaqstandy qurý jónindegi baǵytymyzdy nyǵaıtady. Jańa Qazaqstan – bul únemi ózgerip otyratyn álemde bizdiń jalpyulttyq ereksheligimizdi nyǵaıtýdyń joly», dep atap ótti Olga Perepechına.
Kezdesýde sondaı-aq Konstıtýsıaǵa engiziletin túzetýler jáne olardyń qazaqstandyqtardyń ómirine qalaı áser etetini egjeı-tegjeıli talqylandy. Kezdesýge aýyl turǵyndary, memlekettik qyzmetkerler, JSHS eńbek ujymdary men sharýa qojalyqtary qatysty. Sonymen qatar, turǵyndardy sýmen qamtamasyz etý, kentishilik joldardy jóndeý, uıaly baılanys pen ınternettiń bolmaýy sıaqty ózekti máseleler de kóterildi.