Tegeranda Kaspıı teńizi máseleleri jónindegi Joǵary deńgeıdegi jumys tobynyń tórtinshi otyrysy ótti. Almaty-akshamy.kz Inform.kz-ke silteme jasap habarlaıdy.
Kelissózderge Qazaqstan Respýblıkasynyń (basshysy – Z.A.Amanjolova), Ázerbaıjan Respýblıkasynyń (basshysy – H.A.Halafov), Reseı Federasıasynyń (basshysy – M.I.Petrakov) jáne Túrikmenstannyń (basshysy – M.G.Atadjanov) delegasıalary qatysty.
Otyrysta Iran Islam Respýblıkasy delegasıasynyń basshysy M. Barımanı tóraǵalyq etti.
«Otyrystyń kún tártibine sáıkes Kaspıı teńizinde tikeleı bastapqy syzyqtardy belgileý ádistemesi týraly kelisim jobasy talqylandy. Bul qujatty kelisý odan ári jalǵasatyn bolady. Taraptar Túrikmenstanda ótýi josparlanǵan Altynshy Kaspıı samıtine daıyndalýǵa qatysty máselelerdi qarastyrdy, sondaı-aq Kaspıı teńizindegi yntymaqtastyqtyń túrli baǵyttary boıynsha pikir almasty. Delegasıalar ótken kelissózderge oń baǵa berip, otyrysty joǵary deńgeıde uıymdastyrǵany úshin Iran Islam Respýblıkasyna rızashylyqtaryn bildirdi», - delingen habarlamada.
QR SİM málimetinshe, Kaspıı teńizi máseleleri jónindegi Joǵary deńgeıdegi jumys tobynyń kelesi otyrysy Túrikmenstanda ótedi. Onyń datasy dıplomatıalyq arnalar arqyly kelisiletin bolady.