Qasym-Jomart Toqaev oblys ákimine óńirdegi turaqty áleýmettik-ekonomıkalyq damýdy qamtamasyz etýdi tapsyrdy.
Prezıdentke oblys ákimi aımaqtyń áleýmettik-ekonomıkalyq jaǵdaıy men damý perspektıvalary, ınvestısıa tartý, munaı qorynyń sarqylýyna baılanysty gaz óndirý, jańa geologıalyq zertteý jumystary týraly baıandady, dep habarlaıdy Almaty-akshamy.kz Aqordaǵa silteme jasap.
Aımaqtyń negizgi makroekonomıkalyq kórsetkishterinde 7 aıdyń qorytyndysy boıynsha oń dınamıka bar. Atap aıtqanda, byltyrmen salystyrǵanda tartylǵan ınvestısıalar kólemi 111,5 paıyz, óndeý ónerkásibiniń kólemi 105,5 paıyz ósken.
Nurlybek Nálibaev munaı qorynyń sarqylýy saldarynan munaı óndirý kóleminiń kemýiniń ornyn toltyrý úshin seısmıkalyq barlaý, gaz qorlaryn ıgerý jumystary qolǵa alynǵanyn jetkizdi.
Investorlarmen jumys qarqyn alyp keledi. Prezıdenttiń tapsyrmasyna sáıkes, quny 215 mıllıard teńgeni quraıtyn, qýaty 240 megavatt jańa jylý elektr ortalyǵy salynyp, 2025 jyly tapsyrylady. Sonymen qatar jeke ınvestor esebinen 11,8 mıllıard teńgege Qyzylorda qalasy áýejaıynyń jańa termınaly 2024 jyly halyq ıgiligine berilmek.
Oblys ákimi Syrdarıa ózeniniń joǵarǵy aǵysynda ornalasqan memleketter arasyndaǵy kelissózder nátıjesinde sý kólemi byltyrǵy deńgeıden artqanyn jetkizdi. Aımaqta sýdy az qajet etetin maıly jáne jemdik daqyldar alqaptaryn ulǵaıtýǵa basymdyq berilip, baqsha jáne kókónis alqaptarynyń kólemi kóbeıgen. Sondaı-aq kúrish salasyn damytýdyń jańa baǵdarlamasy ázirlenbek.
Memleket basshysyna baıandalǵan taǵy bir másele – eńbek daýlaryn sheshý. Aımaqtaǵy iri 49 kásiporynmen memorandýmǵa qol qoıyldy. Aldaǵy ýaqytta qyzmetkerlerdiń eńbekaqysyn kezeń-kezeńimen arttyrý kózdelgen.
Bıyl oblysta 9 mektep, 1 Oqýshylar úıi, 2 balabaqsha paıdalanýǵa berilip, 11 dene shynyqtyrý kesheni, 6 mádenı nysannyń qurylysy júrip jatyr.
Qasym-Jomart Toqaev oblys ákimine óńirdegi turaqty áleýmettik-ekonomıkalyq damýdy qamtamasyz etýdi tapsyrdy.