Prezıdent bul mádenı is-shara Gınnes rekordtar kitabyna enedi dep senedi.
Memleket basshysy mádenıet qaıratkeri Aıtjan Toqtaǵanǵa alǵys hat joldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Nazarbaev zıatkerlik mektebiniń oqýshylarymen aýqymdy dombyra sabaǵyn ótkizgen Qazaqstan Respýblıkasynyń Eńbek sińirgen mádenıet qaıratkeri Aıtjan Toqtaǵanǵa alǵys hat joldady.
«Halyq murasyn nasıhattaý jáne úıretý isine bel sheshe kirisip, kópshilikke belgisiz týyndylardy notaǵa túsirip, olardyń avtorlaryn anyqtaýǵa atsalysyp kelesiz. San jylǵy zertteý jumystaryńyzdyń nátıjesi ispetti eńbekterińiz qazirgi tańda mýzyka mektepteri men oqý oryndarynda oqýlyq retinde qoldanylyp júr. Al Nazarbaev zıatkerlik mektebiniń myńnan astam oqýshysy qatysqan dombyra sabaǵyńyz óskeleń urpaqtyń ulttyq kúı ónerine qyzyǵýshylyǵyn arttyryp, bilimin tereńdetken mańyzdy sharalardyń biri boldy. Ulttyq ónerdi ulyqtaýǵa baǵyttalǵan bul mádenı is-shara Gınnes rekordtar kitabyna enedi dep senemin», – delingen alǵys hatta.
Eske salsaq, fızıka-matematıka baǵytyndaǵy Nazarbaev zıatkerlik mektebinde 2021–2022 oqý jyly dombyra sabaǵymen aıaqtalyp, oǵan myńnan astam oqýshy qatysty. Dombyra sabaǵyn mádenıet qaıratkeri Aıtjan Toqtaǵan ótkizdi. Osy dombyra sabaǵy Gınnes rekordtar kitabyna enýi múmkin.