Pandemıadan keıingi alǵashqy tolyqqandy samıt.
Qazaqstan Prezıdentiniń tóraǵalyǵymen TMD-ǵa múshe memleketter basshylary keńesiniń keńeıtilgen quramdaǵy otyrysy ótti, dep habarlaıdy Almaty-akshamy.kz Aqordanyń baspasóz qyzmetine silteme jasap.
Jıynǵa Ázirbaıjan Prezıdenti Ilham Álıev, Armenıa Premer-Mınıstri Nıkol Pashınán, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Tájikstan Prezıdenti Emomolı Rahmon, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıóev, sondaı-aq TMD Atqarýshy komıtetiniń tóraǵasy Sergeı Lebedev jáne Reseı Federaldyq jınalysy Federasıa keńesiniń tóraǵasy Valentına Matvıenko qatysty.
Memleket basshysy búgingi is-shara TMD elderiniń COVID-19 pandemıasynan keıingi alǵashqy tolyqqandy samıti ekenin atap ótti.
«Shaǵyn quramda biz yntymaqtastyǵymyzdy odan ári nyǵaıtýdyń ózekti máseleleri jóninde jan-jaqty pikir almastyq, Táýelsiz memleketter dostastyǵyn damytýdyń negizgi basymdyqtaryn aıqyndadyq. Bul COVID-19-dan keıingi TMD-nyń oflaın formattaǵy alǵashqy tolyqqandy samıti ekenin atap ótkim keledi. Jalpy, astanamyzda qaıta bas qosýymyz qýanyshty jaıt», - dedi Qasym-Jomart Toqaev.
Memleketter basshylary birden resmı qujattarǵa qol qoıý rásimine kóshýge kelisti.
«Qajetti qujattarǵa qol qoıylyp jatqanda biz TMD Atqarýshy hatshysy laýazymyn TMD Bas hatshysy laýazymyna ózgertý týraly máseleni shaǵyn formatta talqylaǵanymyzdy jarıalaǵym keledi. Atalǵan máselege qatysty men osyndaı usynys jasadym. Sebebi keshe biz AÓSSHK Atqarýshy hatshysy laýazymyn Bas hatshy laýazymyna ózgertý týraly sheshim qabyldadyq. Buǵan deıin SHYU-nyń Atqarýshy hatshysy da Bas hatshy laýazymyna ózgertildi. Negizinde, bul atqarýshy organ laýazymynyń mártebesin arttyrý úshin mańyzdy», - dedi Prezıdent.
Prezıdent sózin qorytyndylaı kele, ótkizilgen samıttiń nátıjeli bolǵanyn aıtty.
«Qujattarǵa qol qoıý rásimi aıaqtaldy. Osylaısha, bizdiń otyrysymyz nátıjeli boldy dep aıtýǵa tolyq negiz bar. Sonymen qatar qujattardy qabyldaýdan bólek delegasıa basshylary, meniń oıymsha, TMD sheńberindegi kópjosparly ózara is-árekettiń keń aýqymy jáne halyqaralyq kún tártibi jóninde óte paıdaly pikirtalas ótkizdi. Osy rette aıtylǵan mańyzdy usynystar men qaralǵan qujattar TMD keńistigindegi yntymaqtastyqty odan ári damytýǵa jáne jetildirýge baǵyttalady. Bul ortaq maqsatymyzǵa saı keledi. Sóz sońynda TMD Atqarý komıtetiniń qyzmetkerlerine, bizdiń sarapshylarǵa, memleketter basshylary keńesiniń otyrysyn daıyndaýǵa jáne ótkizýge tikeleı atsalysqan Dostastyqtyń barlyq organyna rızashylyǵymdy bildiremin», – dedi Qasym-Jomart Toqaev.
Sonymen qatar jıynda TMD Bas hatshysy Sergeı Lebedev, Reseı Federaldyq Jınalysy Federasıa Keńesiniń tóraıymy Valentına Matvıenko sóz sóıledi.
TMD memleketteri basshylary keńesiniń tóraǵasy, Qazaqstan Prezıdenti Qasym-Jomart Toqaev Táýelsiz Memleketter Dostastyǵynyń gramotasyn memleketaralyq «Mır» teleradıokompanıasynyń tóraǵasy Radık Batyrshınge tabys etti.
Kezdesý sońynda TMD-ǵa múshe memleketter basshylary Mádenıet salasyndaǵy yntymaqtastyqty damytý týraly málimdemege qol qoıdy. Sondaı-aq Dostastyqty odan ári damytýǵa baǵyttalǵan birqatar qujat qabyldandy.