Memleket basshysy Qasym-Jomart Toqaev qazaqstandyqtardy Ulttyq dombyra kúnimen quttyqtady, dep habarlaıdy Almaty-akshamy.kz Inform.kz-ke silteme jasap. Quttyqtaýdyń tolyq mátinin jarıalap otyrmyz.
***
Qurmetti otandastar!
Barshańyzdy Ulttyq dombyra kúnimen shyn júrekten quttyqtaımyn!
Bul – elimiz úshin erekshe meıram. Ony el bolyp atap ótý arqyly halqymyzdyń rýhyn kóterip, tanymyn arttyramyz. Sondaı-aq, uly dala dástúrlerin jas urpaqtyń sanasyna sińirip, tól ónerimizdiń qudiretin tanytamyz.
Shyn máninde, qazaqtyń qara dombyrasy – ultymyzdyń boıtumary. Onyń úni árqaısymyzdyń júregimizge jaqyn. Óıtkeni, qazaq pen dombyra – bir-birinen bólip qaraýǵa bolmaıtyn egiz uǵym. Akademık Ahmet Jubanov «Dombyra – kóshpeli eldiń kónekóz shejiresi» dep beker aıtpaǵan. Qasterli aspaptyń qos ishegine halqymyzdyń búkil bolmysy syıyp tur.
Sonaý Ketbuǵadan beri jalǵasyp kele jatqan dáýlesker kúıshilerimizdiń mol murasy – baǵa jetpes rýhanı baılyǵymyz. Biz tól ónerimizdi dáripteý arqyly asyl qundylyqtarymyzdy ulyqtaı túsemiz.
Qazir Jańa Qazaqstandy qurýǵa kiristik, ulttyń jańa sapasyn qalyptastyrýdy qolǵa aldyq. Órkenıetti el bolý úshin jańa dáýirdiń jaqsy úrdisterin boıǵa sińirý jetkiliksiz. Sonymen birge, saltymyzdy saqtap, eńbekqorlyq qundylyqtaryn keńinen dáriptep, babalar jolyn berik ustanamyz.
Endeshe, jurtymyzben birge dombyra da máńgi jasaıdy. Kúı óneri azattyq rýhyn urpaqtan urpaqqa jalǵastyrady.
Dombyra ár shańyraqtyń tórinde tursyn!
Elimizdiń mereıi tasyp, abyroıy asqaqtaı bersin!