Ózbekstan prezıdenti Shavkat Mırzıeev el konstıtýsıasyna Qaraqalpaqstan egemendigin joıýǵa qatysty ózgeristerdi keri qaıtardy. Prezıdent baspasóz qyzmetiniń Telegram arnasyndaǵy habarǵa qaraǵanda, memleket basshysy Qaraqalpaqstanda zıaly qaýym ókilderimen kezdesýde osyndaı pikir aıtqan, dep habarlaıdy Almaty-akshamy.kz Inform.kz-ke silteme jasap.
Prezıdent búgin Nókis qalasyna baryp, Qaraqalpaqstan Joqarǵy Keńesiniń depýtattary jáne qoǵam belsendilerimen kezdesken. Onyń aıtýynsha, el konstıtýsıasyna ózgerister engizý týraly zań jobasy áli de halyq talqysynda.
«Erekshe aıtarym, «Ózbekstan Respýblıkasynyń Konstıtýsıasyna ózgertýler men qosymshalar engizý týraly» Konstıtýsıalyq zań jobasy jalpyhalyq talqysynan tolyq ótedi. Sodan keıin azamattar bildirgen pikirler negizinde Zań shyǵarý palatasy (Ózbekstan parlamentiniń tómengi palatasy) ony jetildire túsedi», - dedi Shavkat Mırzıeev.
Prezıdent negizgi zańǵa halyqtyń pikirin eskere otyryp ózgeris engiziletinin aıtty.
«Qaraqalpaqstan Respýblıkasynyń ózine tán etnıkalyq, mádenı erekshelikteri, ulttyq ádet-ǵuryptary men qundylyqtary, aıryqsha quqyqtyq mártebesin eskere otyryp, jobadaǵy Qaraqalpaqstan Respýblıkasynyń quqyqtyq mártebesine qatysty normalardy ózgerissiz qaldyrý qajet dep esepteımin. Iaǵnı, Konstıtýsıanyń 70, 71, 72, 74, 75-baptary ózgertilmeıdi», - dep málimdedi Ózbekstan prezıdenti.