Qasym-Jomart Toqaev Fınlándıanyń Syrtqy saýda jáne halyqaralyq damýdy qoldaý mınıstri, Saýda-ekonomıkalyq yntymaqtastyq jónindegi qazaq-fın úkimetaralyq komısıasynyń teń tóraǵasy Vılle Skınnarıdi qabyldady.
Memleket basshysy mınıstrge iltıpat bildire otyryp, fın delegasıasynyń sapary ekijaqty yntymaqtastyqqa tyń serpin berý turǵysynan mańyzdy ekenin atap ótti, dep habarlaıdy Almaty-akshamy.kz Aqordaǵa silteme jasap.
Prezıdenttiń aıtýynsha, dıplomatıalyq qarym-qatynas ornaǵan 30 jylda Fınlándıa Soltústik Eýropa memleketteri arasynda ekonomıkamyzǵa eń kóp ınvestısıa quıǵan ekinshi elge aınaldy. Sonymen qatar Fınlándıanyń Ortalyq Azıa elderimen saýda aınalymynyń 90 paıyzy Qazaqstanǵa tıesili.
Qasym-Jomart Toqaev eki memlekettiń saýda-ekonomıkalyq, kólik-logıstıka jáne bilim berý salalaryndaǵy seriktestigin nyǵaıtý mańyzdy ekenin atap ótti. Memleket basshysy fın kásipkerleriniń Qazaqstanǵa quıatyn ınvestısıasyn ulǵaıta túsý úshin jan-jaqty qoldaý kórsetýge daıyn ekenin jetkizdi.
Óz kezeginde Vılle Skınnarı qurmetpen qabyldaǵany úshin Qasym-Jomart Toqaevqa alǵys aıtyp, eki el arasyndaǵy yntymaqtastyqty keńeıtýge áleýet mol ekenin málimdedi.
Mınıstr Qazaqstanǵa saparmen kelgen delegasıa quramynda Nurminen Logistics Plc, Nokia, EastCham Finland, Business Finland, Lamor, Wärtsilä Finland, PayIQ, EPSE sekildi 15 iri fın kompanıasynyń ókilderi bar ekenin jetkizdi. Aldaǵy kezdesýler barysynda saýda-ekonomıkalyq baılanystardy nyǵaıtý máseleleri talqylanady.
Budan bólek, fın tarapy Astanadaǵy Fınlándıa elshiligi janynan Ortalyq Azıa elderiniń azamattaryna qyzmet kórsetetin vıza habyn ashady.
Áńgimelesý barysynda halyqaralyq jáne aımaqtyq kún tártibindegi ózekti máseleler de talqylandy.
Qasym-Jomart Toqaev Fınlándıa Prezıdenti Saýlı Nıınıstóge izgi tilegin joldap, Qazaqstanǵa resmı saparmen kelýge shaqyrdy.