Ekonomıkada artyq aqsha massasy qalyptasty. QR Prezıdenti Qasym-Jomart Toqaev Qazaqstan halqyna kezekti Joldaýynda osy tendensıany retteýdiń joldaryn atady, dep habarlaıdy almaty-akshamy.kz
«Jalpy kólemi 6,3 trln teńgeni quraǵan daǵdarysqa qarsy sharalardyń nátıjesinde ekonomıkada shekten tys aqsha massasy qalyptasty. Biraq osy qarjy jetpeı jatqan salalar bar. Ekinshi deńgeıli bankter shaǵyn sharalarǵa, ásirese, aýyldarǵa aqsha salmaıdy. Sondyqtan mıkroqarjylyq uıymdardyń áleýetin iske qosý qajet. Olar jergilikti oryndarda jumys istep júrgendikten, ondaǵy klıentterdi, olardyń bıznesin, múmkindikterin jaqsy biledi. Ulttyq bank pen Qarjy naryǵyn retteý jáne damytý agenttigi osy másele boıynsha sheshimder paketin daıyndaýy tıis», - dedi Memleket basshysy.
Sondaı-aq, ol Ulttyq qordyń aktıvterin qalpyna keltirý úshin búdjettik erejege kóshýdi jedeldetýdi tapsyrdy.
«Sońǵy kezde memlekettik shyǵys mindettemelerin jabý úshin búdjet tapshylyǵy men Ulttyq qordan alynatyn transferttiń artý tendensıasy baıqalýda. Únemi mundaı jeńil jolmen júrý múmkin emes. Qarjylyq turaqtylyq qory sheksiz emes. Búdjettiń kirisin arttyrý boıynsha sharalar qajet ekeni anyq. Biraq birinshi kezekte memlekettik shyǵyndardyń kólemi men tıimdiligine baqylaý kerek. Ulttyq qor aktıvterin qalpyna keltirý úshin búdjettik erejeni engizýdi jedeldetý kerek. Tıisti zańnamalyq túzetýler jyldyń sońyna deıin qabyldanýy qajet», - dedi Prezıdent.