Qazaqstandy endi eshteńe toqtata almaıdy
Elimiz bıyl eshkim kútpegen tehnologıalyq serpilis jasady. Jyldyń aıaǵynda Qyzylordada otandyq áınek zaýytynyń satyp alýshylarǵa daıyn ónimniń alǵashqy partıasyn jibergenin jazǵan bolatynbyz.
Araǵa 3 kún salyp, Atyraýda "KPI" gazohımıalyq zaýyty "plasmassanyń koroli" - polıpropılen óndirdi. Alǵashqy partıa zaýytpen kontraktqa otyryp qoıǵan otandyq kompanıalarǵa jóneltildi. Qazir zaýyt 10 kontraktqa qol qoıyp qoıdy, ol boıynsha buǵan deıin polıpropılendi Reseı men Ázirbaıjannan satyp alyp kelgen bizdiń kompanıalar endi otandyq polýfabrıkatty alatyn bolady. Olar otandyq polımerden qapshyqtar, bamperler, setkalar jasaıdy. Alǵashqy kelisim boıynsha 8 myń tonna polıpropılen satyldy.
KPI - Eýrazıadaǵy eń myqty zaýyt. Ózbekstan, Ázirbaıjan, Túrkimenstan zaýyttary birikse de, bizdiń zaýyttyń kólemindeı ónim shyǵara almaıdy. Onyń jyldyq qýaty - 500 myń tonna polıpropılen. Osymen eseptesek, zaýyttyń jyldyq vyrýchkasy kem degende 105 mıllıard teńge bolatynyn boljaýǵa bolady. Reseıdegi eń alyp zaýyt - Sıbýr holdıńiniń quramyna kiretin "Tobyl-Polımerdiń" ózi jylyna tek 436 myń tonna polımer óndiredi.
Endi Atyraý - máńgilik kıeli meken. Onda munaı taýsylsa, ol plasmassa astanasy bolyp sanalyp, óziniń ekonomıkalyq órleýin jalǵastyra bermek.
KPI - polıpropılenniń eń kóp taralǵan, baǵasy arzan 11 túrin shyǵarady. Bul jańalyqtan shabyt alǵan otandyq ınvestorlar tez arada Shymkentte osy polımerdiń eń qymbat, premıým túrin shyǵaratyn zaýyt turǵyzatyn boldy. Iaǵnı biz polıpropılenniń arzanyn da, qymbatyn da jasaıtyn bolamyz.
Qyzylorda áınek, Atyraý men Shymkent polımer óndirse, Aqtaý odan da ári ketti. Qazaqtyń bolashaǵy - logıstıka, tranzıt jaǵynan da, energıa jaǵynan da Aqtaýǵa tikeleı baılanysty bolady.
Aqtaý - bolashaqtyń munaıy - "jasyl" gıdrogen (sýtegi/vodorod) óndirmek. Shved tehnologtary men ınvestorlary osy jobany daıyndaı bastady. Qazaqstan úkimeti tikeleı qoldaý kórsetip otyr. Jasyl degenimiz - elektrolızben alynatyn, al oǵan kerek energıany kún men jel generasıasy beretin sýteginiń eń ekologıalyq taza óndirisi. Mundaı gıdrogendi 2060 jyly munaı men kómirden ketemiz dep otyrǵan Batys álemi alaqanynda ustaıtyny anyq.
Strategıalyq turǵydan qarasaq, Qazaqstan kesheginiń otyny - kómirdi, búginginiń otyny - munaı men gazdy, erteńginiń otyny - ýrandy qazir óndirip otyrǵan, jáne onymen qoımaı sýperbolashaqtyń otyny - gıdrogenniń qamyna búginnen bastap kirisip jatqan álemdegi sanaýly memleket.
Sondyqtan, órkenıet pen tehnıkalyq progresten biz eshqashan tys qalmaımyz. Biz osy prosesterdiń ishindemiz jáne álemge kerek memleketpiz.