«Sol jaq kózdiń glaýkomasy, asqynǵan katarakta» degen dıagnoz qoıylǵan 68 jastaǵy zeınetker Almatydaǵy Ortalyq qalalyq klınıkalyq aýrýhana mamandarynyń kómegine júgingen.
Dárigerler onyń kózine kúrdeli ota jasap, kórý qabiletin qalpyna keltirdi, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Habarlamaǵa súıensek, pasıenttiń ekinshi kózi múlde kórmeı qalǵan. Iaǵnı, oń jaq kóz IV deńgeıli glaýkoma, ıaǵnı zaǵıptyq stadıasyna ótip ketken. Bólimshe meńgerýshisi Gúlzat Ábdiraıymova bastaǵan mamandar ájeıdiń jasy, joǵarǵy qan qysymy syndy qosymsha syrqattaryna qaramastan kúrdeli ota jasaý týraly sheshim qabyldady.
Asqynǵan kataraktaǵa ota jasalyp, kózge jasandy qarashyq ornatyldy. Operasıa jarty saǵatqa sozyldy. Bul pasıentti kataraktadan aryltyp, kórý qabiletin qalpyna keltirýdiń jalǵyz joly bolatyn, deıdi dáriger.
«Joǵary qan qysymyn, onyń ústine, aıaq jolyn kórýge sep bolyp otyrǵan jalǵyz kózge ota jasaý qajettigin eskere otyryp, aldymen naýqastyń densaýlyǵyn retteýge kúsh saldyq, daıyndadyq. Mundaı kúrdeli operasıa pasıent úshin ǵana emes, hırýrg úshin de qaýipti boldy. Pasıenttiń baqytyna qaraı, oftalmologtardyń biliktiliginiń arqasynda ota sátti ótti. Qazir pasıenttiń kózi jaqsy kóredi», - deıdi maman.
«Keremet! Men endigi sý qarańǵy bolyp qalǵan shyǵarmyn dep oılaıtynmyn. Bul keremetti jasaǵan Gúlzat Talǵatqyzyna alǵysym sheksiz! Ota jasap, maǵan jaryq dúnıeni kórý baqytyn syılady. Dárigerlerdiń denine saýlyq, baqyt tileımin. Aldaǵy ýaqytta da jumysta tabysty bolyńyzdar, aq halatty abzal jan degen qurmetke laıyq bolyńyzdar! Osynsha adamǵa kóz janaryn «qaıtaryp», kórýge múmkindik syılap jatqan qoldaryńyz dert kórmesin», - dedi apa.
Esterińizge sala ketsek, Ortalyq qalalyq klınıkalyq aýrýhana Almatynyń ǵana emes, respýblıka óńirleriniń halqyna josparly oftalmologıalyq kómek kórsetetin ońtústik astanadaǵy jalǵyz qalalyq aýrýhana. Osy jyldyń 9 aıynda mindetti áleýmettik medısınalyq saqtandyrý paketi sheńberinde 600-ge jýyq ota jasaldy. Olardyń basym bóligi osyndaı joǵary tehnologıalyq kúrdeli otalar.