Qazaqstan satyp alatyn Pfizer vaksınasynyń qunyn óndirýshi kompanıa jarıa etýge ruqsat bermedi. Bul týraly QR Densaýlyq saqtaý mınıstri Alekseı Soı aıtty, dep habarlaıdy almaty-akshamy.kz
«Buǵan deıin aıtqanymdaı, qazan men qarasha aıynda kútip otyrmyz. Barlyǵy Pfizer kompanıasynyń jetkizilimine baılanysty. Baǵasyna qatysty aıtar bolsam, qazirgi ýaqytta Pfizer kompanıasynan málimetterdi jarıa etpeý týraly hat aldyq. Sondyqtan da bul másele boıynsha Pfizer kompanıasyna júginý qajet. Eger olar derekterdi jarıa etýge ruqsat berse, onda jarıa etemiz. Olaı bolmaǵan jaǵdaıda, kelisimshart buzylyp, vaksınany jetkizý merzimi de saqtalmaýy múmkin. Sondyqtan kez kelgen kompanıamen jumys barysynda kelisimshartty saqtaýǵa tıispiz», - dedi mınıstr.
Alekseı Soıdyń aıtýynsha, Pfizer kompanıasy Qazaqstan vaksınany qansha somaǵa satyp alatyndyǵyn jarıalaýǵa ruqsat bermeı otyr.
«Biz jeke suranys ta jiberdik. Ony jarıa etkimiz de kelgen. Biraq, qazirgi ýaqytta kompanıa bizge bulaı jasaýǵa tyıym salyp otyr. Kompanıa bul máseleni taǵy qarastyrady dep oılaımyz. Búgin málimetterdi jarıa etýge qatysty taǵy da kelissóz júrgizdik. Degenmen, qazirgi ýaqytta bizde shekteý tur. Sondyqtan múmkindik týyndaǵan boıda birden jarıa etemiz. Jalpy, ózge elderdegi baǵamen birdeı. Bul - kompanıanyń baǵa saıasaty», - dedi Alekseı Soı.