Aqorda rezıdensıasynda 11 memlekettiń tótenshe jáne ókiletti elshileriniń Qazaqstan Prezıdentine senim gramotalaryn tapsyrý rásimi ótti, dep habarlaıdy almaty-akshamy.kz
Senim gramotalaryn Birikken Arab Ámirlikteriniń elshisi Mýhammad Saıd Ál-Arıkı, Shveısarıanyń elshisi Devıd Grıhtıng, Irlandıa elshisi Braıan Makeldaff, Meksıka elshisi Hose Lýıs Martınes Ernandes, Jańa Zelandıa elshisi Sıaleı Allegra van Týr, Albanıa elshisi Kastrıot Robo, Grenada elshisi Oleg Fırer, Mavrıtanıa elshisi Sıd’Ahmed Ál Bekaıe Hamadı, Týnıs elshisi Tarak Ben Salem, Norvegıa elshisi Djon Mıkal Kvıstad jáne Nıkaragýa elshisi Alba Asýsena Torres Mehıa tapsyrdy.
Qasym-Jomart Toqaev dıplomattardy elimizdegi mısıalarynyń resmı bastalýymen quttyqtady.
– Sizder Taıaý Shyǵys, Eýropa, Latyn Amerıkasy, Karıb baseıni, Afrıka jáne Okeanıa sıaqty álemniń ár bóliginiń ókilisizder. Qazaqstan halyqaralyq yntymaqtastyqty nyǵaıtýdy jaqtaıtyn el retinde sizderdiń memleketterińizben aradaǵy dostyq baılanystardy ekijaqty formatta da, kópjaqty formatta da odan ári nyǵaıtýǵa daıyn, – dedi Prezıdent.
Memleket basshysy dıplomattardyń nazaryn el Táýelsizdiginiń 30 jyldyq tarıhı kezeńine aýdardy. Sondaı-aq qazirgi Qazaqstannyń kemeline kelgen, qalyptasqan, ishki jaǵdaıy turaqty, alýantúrli ulttar birliginiń tıimdi úlgisin kórsetip otyrǵan, sondaı-aq qarqyndy ekonomıkalyq ósimi bar jáne teńgerimdi syrtqy saıasat ustanatyn syıly memleket ekenin atap ótti.
Sonymen qatar Prezıdent elimizdiń qazirgi syn-qaterlerdi, onyń ishinde klımattyń ózgerýinen týyndaǵan qaýipterdi eńserý jónindegi ádisterine toqtaldy. Onyń pikirinshe, aldaǵy ýaqytta Glazgoda ótetin jahandyq konferensıada qabyldanatyn sheshimderdiń oryndalýy asa mańyzdy bolmaq. Osyǵan baılanysty Memleket basshysy Qazaqstannyń kómirtegine beıtarap bolýǵa qol jetkizý jónindegi josparyn eske saldy.
– Osy aıda biz Kómirteginen beıtarap damýdyń 2060 jylǵa deıingi tujyrymdamasyn júzege asyrýǵa kirisemiz. Jasyl ekonomıkany qarjylandyrý jáne jasyl tehnologıaǵa qoljetimdilik atalǵan bastamany iske asyrýda mańyzdy ról atqarady. BAÁ, Shveısarıa, Irlandıa, Jańa Zelandıa jáne Norvegıa memleketterimen qatar sizderdiń de elderińizben yntymaqtastyqty nyǵaıtamyz degen úmittemiz, – dedi Prezıdent.
Qasym-Jomart Toqaev azyq-túlik jáne sý qaýipsizdigin qamtamasyz etýdiń mańyzdylyǵyna mán berdi.
– Qazaqstan azyq-túlik tasymaldaýdyń jahandyq júıesine belsendi atsalysady. Biz aýyl sharýashylyǵy sektoryn ekologıalandyrýǵa jáne turaqty damytýǵa nıettimiz. Azyq-túlik qaýipsizdigi jónindegi Islam uıymyn qurýǵa bastamashy boldyq jáne qazirgi ýaqytta osy uıymǵa tóraǵalyq etip otyrmyz. Onyń quramyna 1,5 mıllıardqa jýyq halqy bar 36 el kiredi, – dedi Prezıdent.
Memleket basshysy Eýropadaǵy qaýipsizdik jáne yntymaqtastyq uıymynyń 2010 jylǵy samıtiniń Astana deklarasıasynda aıtylǵan qaýipsizdik jónindegi ortaq ári birtutas eýroatlantıkalyq jáne eýrazıalyq qoǵamdystyqqa beıil ekenin naqtylap, Albanıanyń 2020 jyly EQYU-ǵa tóraǵalyq qyzmetin tıimdi atqarǵanyn aıtty.
Prezıdent qaýipsizdikti qamtamasyz etý máseleleri týraly aıta kelip, Azıada qaqtyǵystardy boldyrmaý jáne beıbitshilikti saqtaý elimizdiń syrtqy saıasatyndaǵy basymdyqtardyń biri ekenin jetkizdi. Bul rette, Memleket basshysy qaýipsizdik máselelerin sheshý jónindegi ujymdyq tásilderdi pysyqtaý úshin tıimdi plaftorma retinde AÓSSHK-niń rólin atap ótti.
Qasym-Jomart Toqaev Aýǵanstandaǵy jaǵdaıǵa da toqtalyp, osy eldiń jańa bıligin zorlyq-zombylyqty, zańsyz esirtki tasymalyn jáne baqylaýsyz kóshi-qondy boldyrmaý jónindegi mindetterin oryndaýǵa shaqyrdy.
Sonymen qatar Memleket basshysy elshilerge Qazaqstannyń Aýǵanstandaǵy jaǵdaıdy turaqtandyrý jónindegi halyqaralyq kúsh-jigerge qosqan úlesi týraly aıtty.
– Aýǵan halqyna gýmanıtarlyq kómek retinde quny 2,5 mıllıon dollar bolatyn 5 myń tonna bıdaı unyn jetkizý máselesin pysyqtap jatyrmyz. Mundaı kómek atalǵan elge turaqty túrde berilip otyrady, – dedi Prezıdent.
Qasym-Jomart Toqaev sóziniń sońynda dıplomattarǵa tabys tilep, olardyń memleketteri men úkimetteriniń basshylaryna sálemin joldady.