Kúzgi-qysqy kezeńniń bastalýymen turǵyndarǵa elektr jylytqyshtardy, peshter men gaz jabdyqtaryn paıdalaný kezindegi qaýipsizdik erejeleri eske salynýda. Órtterdiń kóbi osy jabdyqtardy paıdalaný erejelerin buzý saldarynan oryn alady, dep habarlaıdy aqshamnews.kz
Shymkent qalasy TJD qyzmetkerleri peshterdi, elektr jylytqyshtardy, elektr jáne gaz jabdyqtaryn qaýipsiz paıdalaný erejelerin túsindirýge erekshe nazar aýdarýda. İs-shara «QazTransGazAımaq» AQ fılıalynyń qyzmetkerleri men Jastar resýrstyq ortalyǵynyń eriktilerimen birlese uıymdastyryldy.
İs-shara barysynda áleýmettik osal toptardaǵy, múmkindigi shekteýli azamattar men ardagerlerge turmystaǵy órt qaýipsizdigi, peshter men gazdy jylytý quraldaryn qoldaný erejeleri túsindirildi. TJD mamandary elektr aspaptary men gaz jabdyqtaryn qaýipsiz paıdalaný tártibin erekshe atap ótti, al gaz qyzmeti ókilderi gaz sıgnalızatorlaryn ornatý jáne paıdalaný týraly tolyq aqparat berdi.
Órt qaýipsizdigi mádenıetin arttyrý maqsatynda suraq-jaýap túrinde túsindirý jumystary júrgizildi. Mamandar ýly gazben ýlaný kezinde alǵashqy kómek kórsetý, elektr jylytqyshtardy ornatý jáne paıdalaný talaptary boıynsha turǵyndardyń suraqtaryna jaýap berdi. Olar shuǵyl qyzmetterdiń baılanys nómirlerin eske salyp, órt qaýipsizdigi týraly jadynamalar taratyp, murjany jylytý maýsymynda qalaı tazalaý kerektigin kórsetti.
Jylytý maýsymy bastalǵaly qatty otynmen paıdalanylatyn 3500-den astam turǵyn úı, sonyń ishinde 83 múmkindigi shekteýli azamattar men ardagerlerdiń úıleri tekserildi. Bul úılerde kezeń-kezeńmen kómirtegi totyǵyn anyqtaıtyn sıgnalızatorlar ornatylýda. Búgingi kúnge deıin 98 ýly gazdy anyqtaıtyn sıgnalızator ornatylyp, 193 peshtiń murjasy arnaıy tásilmen tazalandy.
«Bul sharalar turǵyndar arasynda órt qaýipsizdigin nasıhattap, órt jaǵdaıynda durys áreket etý mádenıetin qalyptastyrýǵa baǵyttalǵan», - dep túsindirdi TJD bastyǵynyń orynbasary Erkin Otarǵalymuly.