Jańa sorǵy-kompressorlyq qubyrlardy jalǵan ornatqan
Mańǵystaý oblysynda «Ózenmunaıgaz» AQ men «BerAlı Mańǵystaý Company» JSHS-da urlyq faktileri boıynsha tergeý júrip jatyr, dep habarlaıdy Almaty-akshamy.kz.
Qarjylyq monıtorıń agenttiginiń málimetine sensek, «Ózenmunaıgaz» AQ jáne «BerAlı Mangıstaý Company» JSHS laýazymdy tulǵalary asa iri kólemde qarajat jymqyrdy degen kúdikke ilingen.
Jańaózen turǵyndarynyń «QazMunaıGaz» AQ (Ózenmunaıgaz) júıesindegi sybaılas jemqorlyq jáne jymqyrý faktileri boıynsha kóptegen ótinishteriniń negizinde Qarjylyq monıtorıń agenttiginiń Mańǵystaý oblysy boıynsha ekonomıkalyq tergep-tekserý departamenti sotqa deıingi birneshe tergeý júrgizip jatyr.
Atap aıtqanda, kásiporynnyń býhgalterlik jáne ózge de resmı qujattamasynda burmalanǵan málimetterdi kórsete otyryp, jańa sorǵy-kompressorlyq qubyrlardy jalǵan ornatý arqyly urlaý faktisi boıynsha «Ózenmunaıgaz» AQ laýazymdy tulǵalaryna qatysty tergeý bastalǵan.
Budan basqa, «Ózenmunaıgaz» AQ laýazymdy tulǵalary men «BerAlı Mańǵystaý Company» JSHS basshylyǵyna 2022 jyly munaı óndirý uńǵymalaryn jóndeý jumysyn oryndaýǵa arnalǵan asa iri kólemdegi qarajatty jymqyrdy degen aıyp taǵylyp otyr.
«BerAlı Mańǵystaý Company» JSHS basshysy óziniń jaqyn týystarymen arnaıy tehnıkany jalǵa alý jóninde shart jasaǵany anyqtaldy. İs júzinde 248 mln teńge kóleminde alynǵan qarajat qolma-qol aqshaǵa aınaldyrylyp jymqyrylǵan.
«Atalǵan is-qımyl arqyly «BerAlı Mańǵystaý Company» JSHS basshylyǵy memleketke ǵana emes, kompanıa qyzmetkerlerine de zıan keltirgenin atap ótemiz. Qolma-qol aqsha kompanıany damytýǵa, jumysshylardyń eńbek jaǵdaıyn jaqsartýǵa, sonyń ishinde jalaqyny kóterýge jumsalsa bolatyn edi. Bul jaǵdaı kompanıanyń qarapaıym qyzmetkerleri arasynda narazylyq týdyrdy. Tergeý barysynda atalǵan faktiler tekserilip jatyr. QPK 201 babyna sáıkes ózge aqparat jarıa etýge jatpaıdy», - dep habarlady agenttik.
Eske sala keteıik, 10 sáýirde Energetıka mınıstrligi ǵımaratynyń aldyna 70-ke jýyq jańaózendik munaıshy jınaldy.