Qazaqstan 34 shet memleketpen sottalǵandardy berý týraly 72 shart jasaǵan. Bul týraly Almaty-akshamy.kz Qazaqparatqa silteme jasap habarlady.
Barlyǵy 72 sharttyń ishinde 29 – qylmystyq ister boıynsha ózara quqyqtyq kómek týraly, 21 – ustap berý týraly, 22 – sottalǵandardy berý týraly kelisim bar.
Bul baǵytta Qazaqstan AQSH, Qytaı, Ulybrıtanıa, Úndistan, BAÁ, TMD jáne basqa da eldermen seriktes.
«Bizdiń elimiz Soltústik jáne Ońtústik Amerıkanyń 26 elin qamtıtyn úsh amerıkaaralyq konvensıalardyń (ustap berý týraly, qylmystyq ister boıynsha quqyqtyq kómek týraly, shetelde qylmystyq jazasyn óteý týraly) tolyqqandy qatysýshysy bolyp tabylady. Qazirgi ýaqytta Fransıa jáne Ózbekstanmen eki shart QR Parlamenti Senatynda ratıfıkasıalaýdan ótýde. Ózbekstanmen sottalǵan adamdardy berý týraly shart olarǵa bas bostandyǵynan aıyrý túrindegi jazasyn óz Otanynda odan ári óteýge múmkindik beredi. Qazir qazaqstandyq kolonıalarda Ózbekstannyń 500-ge jýyq azamaty jazasyn ótep jatyr, al Ózbekstanda bizdiń 20 azamat jazasyn óteýde», - delingen prokýratýra habarlamasynda.