Jetinshi aýrýhana dárigerleri múgedek arbaǵa tańylǵan zeınetkerdi aıaqqa turǵyzdy
64 jastaǵy Uıymhan Qalıbek bes jyldan beri revmatoıdty polıartrıtpen aýyrady. Óziniń aıtýynsha, konservatıvti em-dom eshqandaı nátıje bermegen. Saldarynan sońǵy úsh jylda aıaqtan qalyp, múgedek arbaǵa tańylǵan naýqasqa «Júıeli osteoporoz, 3-4-deńgeıli gonartroz» degen dıagnozben hırýrgıalyq ota jasaý týraly sheshim qabyldandy. Bul týraly Almatydaǵy №7 Qalalyq klınıkalyq aýrýhananyń baspasóz qyzmeti habarlady.
Qytaıda týyp-ósken zeınetker osydan birneshe jyl buryn Shyǵys Qazaqstan oblysyna kóship kelgen. Qazaqstan men QHR-nyń birqatar klınıkalaryna qaralypty. Biri aýqymdy ári kúrdeli otany jasaýdan bas tartsa, endi biri qomaqty qarajat suraǵan. Naýqas jetinshi aýrýhananyń ortohırýrgıa bólimshesine josparly túrde jatqyzyldy. Oǵan mindetti áleýmettik medısınalyq saqtandyrý qarajaty esebinen tegin ota jasaldy.
«Revmotoıdty polıartrıt pen asqynǵan osteoporoz saldarynan súıektiń mort syný qaýpi joǵary boldy. Soǵan qaramastan biz táýekelge bel býyp, kúrdeli operasıa jasadyq. Tize býynyna artqy turaqtandyrǵyshy bar endoprotez ornattyq. Operasıa josparǵa saı sátti ótti. Pasıent erteńine aıaqqa turdy», - deıdi aýrýhananyń ortoped-dárigeri Erlan Amırov.
Aıtýynsha, otadan keıin úsh jyl boıy qozǵalyssyz qalǵan aıaqty búgý, qımyldatý birshama qıyndyq týdyrǵan. Ortohırýrgıa bólimshesinde júrgizilgen erte ońaltý sharasynyń arqasynda operasıa nátıjesi nyǵaıtylyp, pasıent aıaqqa turdy. Arbamen jetkizilgen ol aýrýhana esiginen óz aıaǵymen shyǵyp ketti, deıdi maman.
Uıymhan apanyń úzilgen úmitin jalǵaǵan klınıkaǵa aıtar alǵysy sheksiz.
«Áıelimniń 3 jyldan beri júre almaı, múgedek arbaǵa tańylǵany janyma batatyn. Qalqamandaǵy №7 aýrýhana qyzmetkerleriniń arqasynda ota sátti shyqty. Úsh-aq kúnnen keıin janyn jegen aýrýynan arylyp, qaıtadan aıaqqa turdy. Óz aıaǵyńmen júrip-turǵan degen baqyt qoı. Sondaı qýanysh syılaǵan dárigerlerge kóp raqmet!», - deıdi pasıenttiń jubaıy.