Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynda Anton Chehovtyń «Shıe baǵy» pesasy jelisi boıynsha sahnalanǵan spektákldiń premerasy ótti.
Bul qoıylym – jas ári daryndy rejıser Racha Mahataevtiń sahnalaýymen zamanaýı kózqaraspen qaıta jańǵyrtylǵan klasıka.
– Ótkizgen trenıń aıasynda qoıylym akterlaryn birden tańdap aldym. Pesany qysqartyp, eki aı daıyndaldyq jáne kompozıtor, horeograf, sýretshimen birge birlikpen jumys istedik. Bastapqyda 6 ártisti tańdap alyp, olardyń basy birikken sátte «Shıe baǵyn» qoıýdy josparladyq. Qoıylymdaǵy negizgi ıdeıa – ómirdegi adamnyń sharasyzdyǵy, ólimniń – tragedıa da, azap ta emes ekenin uǵyndyrý, – dedi rejıser.
Rólderdi somdaǵan – Janar Maqasheva, Jomart Zeınábil, Nurjan Asylhan, Rabına Belgibaeva syndy qazaq teatr óneriniń jarqyn tulǵalary.
Spektákldegi basty keıipker – Lúbov Andreevnanyń obrazyn somdaǵan Janar Maqasheva ártisterge rejısermen istegen jumys pen qoıylymnyń úlken sabaq bolǵanyn jetkizdi.
– Daıyndyqqa bir aıdaı ýaqyt ketti jáne rejısermen jumys istegen sondaı unady. Psıholog eken, ishki jan dúnıemizdi aqtara aldy. Ár spektákl ártúrli bolǵandyqtan, bul qoıylym bizge úlken sabaq boldy. Bul keıipkerdiń jan dúnıesi men úshin óte kúrdeli. Keıbir tusyn óz ómirińe engizgiń keledi. Men somdaǵan keıipker qaıǵysyn kúlkimen jasyrýǵa tyrysady. Degenmen, men keıipkerdiń sezimin ózime jaqyn qabyldamaýǵa tyrysamyn. Bastysy, qoıylymda jumysy dese, janyn beretin jandar jınalǵan. Yntyzarlyq tanytqan barsha kórermenge sheksiz alǵys bildiremin, – dedi aktrısa.
«Shıe baǵy» – adamnyń ishki muńy men ómirdiń ótkinshi tustaryn sýretteıtin tereń fılosofıalyq týyndy. Qoıylym – ótken men jańashyldyqqa qadam basý arasyndaǵy kúresti sıpattaıdy. Ásirese, zyrǵyǵan ýaqyt pen men ózgeris zańdylyǵyna moıynsuný, adamnyń taǵdyr jolyndaǵy dármensizdigi tereńinen qaýzalady. Ómir men ólimniń, shyndyq pen elestiń arasyndaǵy názik shekaraǵa oı júgirtip, máńgiliktiń mánin izdeýge jeteleıtin týyndy kórermenniń kóńilinen shyqty.
Aıta keteıik, premera aldaǵy kúnderi de jalǵasady.