Otbasy bankindegi depozıtti endi tek týystarǵa ǵana tabystaýǵa bolady. 21 tamyzdan bastap «Otbasy banktegi» depozıtti satý qyzmeti toqtatylady, dep habarlaıdy Almaty-akshamy.kz. QazAqparat silteme jasap.
«21 tamyzdan bastap Otbasy bankinde depozıtti aqyly túrde tabystaý (depozıtti satý) qyzmeti toqtatylady. Onlaın tabystaý – depozıtterdiń onlaın dúkeni ispettes. Onda klıentterdiń biri salymdaryn sata alsa, ekinshileri jınaqtaý jolyn jyldamdatyp, zaemdy tezirek alý úshin Otbasy bankinen shot satyp ala alady. Byltyrdyń birinshi jartysynda bul múmkindikti 1 647 adam paıdalanǵan. Bıyldyń dál osy kezeńinde depozıtterdi satyp alyp, zaem rásimdegen biregeı klıentterdiń sany eki ese azaıyp, 973 adam boldy. Al birinshi jartyjyldyqta Otbasy bank 28 800 kredıt bergen», - delingen atalǵan bank málimetinde.
Bank aqparatyna qaraǵanda, tek bıylǵy jyldyń basynan beri 273 465 qazaqstandyq jańa jınaq shotyn ashty.
«Otbasy bankinde depozıtterdi týystarǵa tabystaý qyzmeti saqtalady. Ony tek bank bólimshelerinde ǵana emes, «Otbasy bank» mobıldi qosymshasynda onlaın rejıminde de jasaýǵa bolady. Qyzmet 5-10 mınýt ýaqytty alady», - dep naqtylady bank.
Bul qyzmetti týystardyń kelesi sanattary paıdalana alady: áıeli-kúıeýi, ata-anasy, balalary, asyrap alýshylar, asyrap alynǵan balalar, bir ata-anadan nemese ártúrli ata-anadan týǵan aǵa-inileri men apa-sińlileri, atasy, ájesi, nemereleri jáne basqa da jaqyn týystary.
Atap aıtqanda, bank bólimshesine baryp, týystyq qatynasy joq, biraq ortaq týystary bar adamdar arasynda depozıtterdi tabystaýǵa bolady. Mysaly, salymshy bir mámile aıasynda jarynyń aǵasyna óz depozıtin tabystaı alady. Ol úshin neke jáne týystyq qatynasty rastaıtyn qujattar (týý týraly kýálikter) qajet.