Qazaqstan óńirlerindegi tártipsizdikter nátıjesinde ákimshilik ǵımarattar men jyljymaıtyn múliktiń komersıalyq nysandaryna aıtarlyqtaı zıan keltirildi.
Osy jaǵdaıdy eskere otyryp, otandyq zaýyttar qıraǵan nysandardy qalpyna keltirýge qoldaý kórsete bastady, dep habarlaıdy Almaty-akshamy.kz
«ArselorMıttal Temirtaý» AQ kompanıasy zardap shekken óńirlerge armatýralyq ónimderdi óteýsiz negizde jetkizýge daıyn. Aıta ketý kerek, kásiporyn jyl saıyn óz ónimderine sertıfıkattaý jumystaryn júrgizedi. Qazirgi ýaqytta kompanıanyń armatýralyq, qalypqa keltirilgen jáne suryptyq jaımalary birqatar elderdiń ulttyq standarttarynyń talaptaryna sáıkestigine sertıfıkattary bar.
Sonymen qatar, otandyq avtoóndirýshiler 10% jeńildikpen jáne keıinge qaldyrylǵan tólem sharttarymen jańa polısıa mashınalaryn tapsyrýdy bastady. Óz kezeginde otandyq óndirýshiler osy qıyn kezeńdi qysqa merzimde eńserip, zardap shekken salalardy qalpyna keltire alatynymyzǵa senimdi.