Qazaqstandyq ǵalymdar medısınalyq qaldyqtardy joıýdyń ınovasıalyq ádisin oılap tapty
Otandyq plazmohımıalyq reaktordyń balamasy joq. Biregeı qondyrǵy bıomaterıaldy termıalyq zalalsyzdandyrýǵa múmkindik beredi. Ol úshin endi medısınalyq qaldyqtardy suryptaýdyń qajeti joq, dep habarlaıdy Almaty-akshamy.kz
Eki myń gradýs temperatýraǵa deıin qyzǵan peshke túsken kez kelgen zat qas-qaǵym sátte erip, ýytty komponentterdiń ydyraýyna jol berilmeıdi.
«Bizdiń tehnologıanyń basty artyqshylyǵy asa joǵary temperatýranyń qoldanylýynda. Jańa ádis boıynsha reaktorda medısınalyq qaldyqtar ádettegideı otqa jaǵylmaıdy, gazdandyrý arqyly ydyratylady. Nátıjesinde tek taza ekologıalyq gaz ǵana paıda bolady. Iaǵnı beıtaraptalǵan gaz jáne taza ekologıalyq kúl shyǵady. Dástúrli tehnologıadan basty aıyrmashylyǵy osy», - deıdi joba avtory Aleksandr Ýstımenko.
Búginde elimizde medısınalyq qaldyqtar eki ese tómen temperatýrada jaǵylady. «Bul ýly komponentterdiń tolyq joıylýyna múmkindik bermeıdi», – deıdi ǵalym. Infeksıalanǵan joǵary ýytty medısınalyq qaldyqtar adam densaýlyǵy úshin de, qorshaǵan orta úshin de qaýipti ekeni málim. Sondyqtan olardy zalalsyzdandyrýdyń ózge de tıimdi ádisteri qoldanylyp júr.
Avtoklavtaý, ıaǵnı qaldyqtardy bý, sý býy qysymymen óńdeý balamaly ádisteri bar. Ol medısınalyq uıymdardyń ózinde júrgiziledi. Munyń nátıjesinde atmosferalyq qysym arqyly medısınalyq qaldyqtardyń quramyndaǵy zıandy mıkroorganızmder joıylady. Sondaı-aq medısınalyq qaldyqtardy hımıalyq eritindilerge salý nemese qysqatolqyndy qondyrǵylar arqyly zalalsyzdandyrýǵa bolady. Olardyń qataryna kóp uzamaı otandyq ǵalymdardyń plazmalyq óńdeý ádisi qosylýy ábden múmkin.