Qazaqstanda paıdalanylmaıtyn kólik ıelerine salyq raqymshylyǵyn jasaý usynyldy
Depýtat Juldyz Súleımenova Qarjy mınıstrinen kólik salyǵyna qatysty týyndaǵan máseleni surady.
- Qarjy mınıstrliginiń aqparatyna sáıkes, 2020 jyly «E-Salyq-Azamat» qosymshasy engizilgennen bastap, 10 myńnan astam jeke tulǵa kólik salyǵyn túzetýge ótinish bergen. Ótinishter salyq somasyn durys kórsetpeý, salyq salý obektileri joq adamdarǵa bereshekteri jóninde talap qoıý jáne basqa da suraqtardy qamtyǵan. Bul rette bolǵan aqaýlar týraly suraǵanda eki mınıstrlik (Qarjy jáne İshki ister mınıstrlikteri) derbes negizde eshqandaı qatelikterdiń joq ekenin aıtady. Mysaly, İİM óz tarapynan barlyq derek naqty ári durys engizilgen dep kórsetedi. Al Qarjy mınıstrligi óz esepterinde qatelikter joq ekenin málimdeıdi. Qazirgi tańda osy eki mınıstrliktiń bir-birine sálteý nátıjesinde kólik salyǵy problemasy oryndy sheshilmeı otyr. Osy rette jiberilgen qatelikterdiń basty sebebi nede? – dep surady depýtat.
Óz kezeginde Qarjy mınıstri Erulan Jamaýbaev depýtattyń suraǵyna jaýap berdi.
Eki mınıstrlik osy baǵytta aýqymdy jumystardy istedi. Salyq salýshylardyń qatysýynsyz mln-ǵa jýyq aqparatty tolyǵymen ózektendirdik. Iaǵnı bul jerde qateler óte kóp ketken. «E-Salyq-Azamat» qosymshasynyń kómegimen qosymsha qandaı problemalar baryn bilip otyrmyz. Bul jerde halyq tarapynan týyndaǵan másele bar. Atap aıtqanda, adamdar avtokólikti bir-birine senimhat arqyly satyp jiberedi, biraq óziniń atynan shyǵarmaıdy. Odan bólek, urlanǵan kólikter bar jáne halyqtyń birshama kóligi mıgrasıalyq prosestermen basqa memleketterge kóship, kóligin senimhatpen satyp ketedi. Sóıtip kólikti atyna aýdarmaıdy. Osyndaı problemalar baryn moıyndaımyz, - dep aıtty vedomstvo basshysy.
Mınıstr joǵaryda aıtylǵan kemshilikter boıynsha İİM-men birlese jumys júrgizilip jatqanyn aıtty.
- Mysaly, taǵy mynadaı máseleler bar - qaıtys bolyp ketken, shetelge kóship ketken azamattar, 60-70 jyldary shyǵarylǵan avtokólikter bar. Olar qazir júrmeıdi nemese jol apatyna túsken jaramaıtyn kólikter, odan bólek, bólshek saýdaǵa jiberilgen kólikter de bar. Bul máseleler boıynsha Úkimetke osyndaı kólikterge raqymshylyq jasaý boıynsha usynystar berip otyrmyz. Óıtkeni, olar báribir tabylmaıdy, - dep jaýap berdi mınıstr Májiliste.