İshki ister mınıstrligi «Joǵary bilimniń bilim berý baǵdarlamalaryn iske asyryp jatqan QR İshki ister mınıstrliginiń áskerı, arnaýly oqý oryndaryna oqýǵa qabyldaý qaǵıdalaryn bekitý týraly» buıryǵyna ózgeris engizbek, dep habarlaıdy Almaty-akshamy.kz QazAqparatqa silteme jasap.
Atap aıtqanda, endi Otan aldyndaǵy boryshyn ótegen azamattar İshki ister mınıstrliginiń áskerı oqý oryndaryna túse alady.
«Merzimdi áskerı qyzmet ótkergen jáne İİM-niń áskerı oqý oryndaryna túsýge nıet bildirgen jáne oqýǵa túsetin jyly 24 jasqa tolmaǵan azamattar merzimdi áskerı qyzmet aıaqtalǵan sátten bastap bir jyldan keshiktirmeı qabyldaý jyly 1 maýsymǵa deıingi merzimde ishki ister organdarynyń aýmaqtyq bólimshesi, İshki ister mınıstrliginiń áskerı oqý orny basshysynyń nemese turǵylyqty jeri boıynsha áskerı bólim komandıriniń atyna ótinishpen júginedi. Bólim komandıri mindetti arnaıy tekserý jáne áskerı-dárigerlik saraptama qaǵıdalaryna sáıkes, kandıdattyń aldyn ala medısınalyq kýálandyrýdan ótýi boıynsha jumysty uıymdastyrady», - delingen qujatta.
Mindetti arnaıy tekserýden ótken, densaýlyq jaǵdaıy boıynsha oqýǵa jaramdy azamattar 20 shildege deıin qajetti qujattardy tapsyryp, túpkilikti medısınalyq teskeristen ótýi úshin áskerı oqý ornyna barýy tıis.
«İshki ister mınıstrliginiń áskerı oqý ornyna qabyldaý jyl saıynǵy qabyldaý josparynyń 20%-nan aspaıtyn mólsherde Ulttyq ulannyń áskerı bólimderinde buryn júrgizilgen irikteý nátıjeleri boıynsha júzege asyrylady», - dep kórsetilgen buıryq jobasynda.
Áskerı oqý ornyna túsý úshin Otan aldyndaǵy boryshyn ótegenderdiń UBT nátıjesi esepke alynbaıdy.
Olar myna qujattardy usynýy tıis:
- merzimdi áskerı qyzmet ótkergenin rastaý týraly anyqtama (HQKO-dan nemese E-GOV aqparattyq júıesi arqyly alynǵan);
- usynym (komısıanyń konkýrstyq irikteýden ótkeni týraly qorytyndysy).
Qujat 29 naýryzǵa deıin kópshilik talqylaýda bolady.