Jasóspirimder tárbıesi – qoǵamda keń talqyǵa túsetin taqyryptardyń biri. Ásirese, balanyń tulǵa retinde qalyptasýynda aınalasyndaǵylardan keletin kómektiń orny erekshe. Ómirden óz ornyn izdegen jasóspirimniń jaman jolǵa túspeı, durys tańdaý jasaýy – óte mańyzdy. Almaty qalasy Oqýshylar saraıynyń qala syrtyndaǵy «Órnek» lageri de osy baǵytta jumys isteıdi. Sodan da bolar, «Órnek» lagerinde balalardyń jarqyn jazǵy demalysy erekshe estelikke aınalýda.
Qalalyq Bilim basqarmasyna qarasty Oqýshylar saraıynyń «Órnek» lagerindegi jaz qyzyǵy erekshe qyza túsken. Jazǵy demalystyń oqýshylar úshin orny tipti bólek. Áý bastan-aq jazǵy demalys basqa demalystarǵa qaraǵanda uzaq ári qyzyqty bolyp keledi. Sondyqtan bolar, balalar da osynaý kezeńdi taǵatsyzdana tosady. Ári bul mezgilde toǵyz aı boıy tynymsyz oqyp, bilim alǵan balanyń aǵzasy tynyǵyp, demalýdy qajet etedi.
Osyǵan oraı, toqsan saıyn mektep oqýshylaryna úzilis jasalyp otyrsa da, sonyń eń uzaǵy – jazǵy demalys. Jalpy, jazǵy demalys balalardyń negizgi sabaqtan, úırenshikti áreketinen bosap, óz qyzyǵýshylyǵymen aınalysýyna múmkindik beredi. Onyń ústine, jaz mezgili mektep oqýshylarynyń jalpy fızıologıalyq, sana-sezimi jaǵynan, dúnıetanymdyq turǵyda damý, jetilý kezeńi. Olardyń ómirindegi eń umytylmas estelikter de osy jazǵy demalys lagerinen bastaý alady. Sondyqtan balalar úshin jazǵy demalystyń árbir kúni qymbat.
Qalamyzdaǵy «Januıa» kesheniniń tárbıelenýshileri sondaı-aq Oqýshylar saraıynyń bilim berý birlestikterinde jyl boıy bilim alyp júrgen áleýmettik osal otbasylardan shyqqan balalar bıyl da jazǵy demalystaryn «Órnek» demalys lagerinde ótkizip jatyr. Balalarǵa mundaǵy «Robototehnıka», Astronomıa, VR jáne AR, Lego, EMC, «Ǵylym álemine ekspedısıa» saıahat, «Núton zerthanasy» (Fızıka), «Ǵarysh mısıasy» (Astronomıa), «ElektroıkLAB» (Elektr) sheberlik sabaqtary, qyzyqty jarystar men oıyn baǵdarlamalary, sporttyq oıyndar erekshe unaıdy. Árıne, balalar tańǵy as pen túski jáne keshki asty súısine jeıdi. «Órnektegi» jaz ár balanyń esinde jaǵymdy jańalyǵymen qalary sózsiz.
Balalarǵa Neırotehnologıa, Jýrnalısıka, AERO, IT pedagogtary sabaq júrgizedi. Munda mindetti túrde «Neptýn kúni» atap ótiledi. Bul merekeniń maqsaty – balalarǵa sý tirshilik kózi ekenin úıretip, sýmen oınaıtyn oıyn erejesin saqtaı otyryp, balalardyń qımyl-qozǵalysyn, shapshańdyǵyn shyńdaý, olardy dostyq pen uıymshyldyq qaǵıdattaryna adaldyqqa tárbıeleý.
Ár aýysymda balalar tek demalyp qana qoımaı, shyǵarmashylyq pen bilimge toly saıahattarǵa attanady. Olar túrli sporttyq oıyndarǵa qatysyp, qolónermen aınalysady, ǵylymı jańalyqtarmen tanysyp, túrli baıqaýlar men sheberlik saǵattarynda óz qabiletterin shyńdaıdy.
«Órnek» lageri – balalar úshin jańa daǵdylar men jańa dostar tabatyn orta desek, artyq aıtqandyq emes. Munda ár kún tańǵajaıyp oqıǵalarǵa toly: birde balalar teleskoppen Kúndi baqylaıdy, kelesi kúni anımasıa keıipkerlerin jasap, dron ushyryp, ǵylym álemine saıahat jasaıdy. Shahmat oınaýdy, orıgamı jasaýdy, tipti suhbat júrgizýdi de úırenedi.
Shynaıy dostyq ornaǵan ortada balalardyń kúlkisi men belsendiligi lager aýmaǵyn shattyqqa bóleıdi, óıtkeni munda tárbıeshiler óte joǵary dárejede jumys isteıdi. Aýysym sońyndaǵy eń áserli sátterdiń biri – qoshtasý alaýyn jaǵý rásimi. Bul keshte ár top qoshtasý sátine arnalǵan ónerlerin kórsetip, shynaıy dostyq sheńberin quryp, án shyrqaıdy.
«Órnekte» ótken árbir kún – balalardyń júreginde máńgi saqtalatyn ortaq estelik, qýanysh pen tabystyń sımvoly. Jaz áli jalǵasyp jatyr, alda lager demalýshylaryn áli talaı qyzyqty oqıǵalar men qýanyshty sátter kútip tur.
