Qarjy monıtorıńi agenttigi men Oqý-aǵartý mınıstrligi osyndaı pılottyq jobany qolǵa almaqshy, dep habarlaıdy Almaty-akshamy.kz QazAqparatqa silteme jasap.
«Agenttiktiń bastamasy boıynsha, qyrkúıek aıynda Oqý-aǵartý mınıstrligi 5-11 synyptardyń úlgilik oqý josparynyń varıatıvtik komponentine «Bıznes jáne kásipkerlik negizderi» jáne «Qarjylyq qaýipsizdik» atty bólimderden turatyn «Jahandyq quzyretter» kýrsyn engizdi.
Halyqaralyq oqý-ádisteme ortalyǵynyń qatysýymen kórneki materıaldary bar oqytý ádistemesi jasaldy. Sonymen qatar, aldyn alýdyń qosymsha quraly retinde qarjylyq qaýipsizdik boıynsha olımpıadany ótkizý josparlanyp otyr. Mundaı tájirıbeni kóptegen elder qoldanady. Qazaqstannan stýdentteri bıyl Reseı Federasıasynyń Sochı qalasynda ótken halyqaralyq olımpıadadan júldeli oraldy. Olımpıadaǵa irikteýge álemniń 12 elinen 40 myńnan astam stýdent qatysqan bolatyn», - dedi Qarjy monıtorıńi agenttigi kadrlyq jumys departamentiniń dırektory Nurlan Adalıev.
Aıtýynsha, atalmysh olımpıada oqýshylar arasynda pılottyq rejımde ótpek.
«Bıylǵy oqý jylynan bastap elimizdiń birqatar óńirinde oqýshylar arasynda qarjylyq qaýipsizdikten pılottyq olımpıada ótkizý týraly kelisim bar. Ony daıyndaýǵa halyqaralyq joǵary oqý oryndarynyń ókilderi men agenttik ókilderi atsalysty. 2023 jyly qarjylyq saýattylyq boıynsha sabaqtar ótkizip, olımpıadany uıymdastyrý usynysyn Oqý-aǵartý mınıstrliginiń ǵylymı saraptamasy oń baǵalap, maquldap otyr», - dedi ol Ortalyq komýnıkasıalar qyzmetinde ótken brıfıńte.