Qazaqstannyń Tuńǵysh prezıdenti Nursultan Nazarbaev alǵash ret ekinshi otbasynyń jáne eki ulynyń bar ekenin moıyndady, dep jazady stan.kz.
BAQ-taǵy aqparatqa súıensek, Nursultan Nazarbaev «Meniń ómirim» atty estelikter kitabyn jazyp shyqqan. «Folıant» baspasynda basylǵan kitapta tuńǵysh prezıdent ómiriniń saıası jáne jeke qyrlary týraly sóz qozǵaǵan. Kitap satylymǵa shyqpaǵan, alǵashqy nusqalary tek saıasatkerler, sarapshylar men jýrnalıserdiń qolyna tıgen kórinedi.
Kitapqa alǵashqylardyń biri bolyp qol jetkizgen saıasattanýshynyń aıtýynsha, kitapta 2011 jylǵy Jańaózendegi oqıǵalarǵa, 2019 jylǵy bılik tranzıti, qandy Qańtarǵa arnalǵan jeke taraýlar bar. Sonymen qatar, Nazarbaev alǵash ret ekinshi otbasy bar ekeni, áıeli Ásel Isabaeva men eki uly týraly jazǵan.
Saıasattanýshy orda.kz redaksıasyna kitaptan osy týraly úzindimen bólisken.
«Bir kúni Taldyqorǵanǵa barýdyń sáti tústi. Memleket basshysynyń óńirlerge jasaǵan jumys saparlary kezinde ony ushaq baspaldaǵynan gúl shoqtarymen qarsy alady. Mundaı rásimge qatysý úshin eń sulý jergilikti qyzdar irikteletini belgili. Biz burynnan úırenip qalǵan ádemi rásim. Biraq bul jolǵy oqıǵa erekshe áser qaldyrdy. Áýejaıda maǵan gúl syılaǵan qyz tańǵalarlyq sulý edi. Uzaq ýaqyt esimde boldy, sodan keıin jalyndaǵan kelbeti men talǵampaz, kesilgen keskini bar ádemi sulýdy jıi esime aldym.
Biraz ýaqyt ótti. Taldyqorǵan áýejaıynda meni qarsy alǵan sol sulý qyzdyń beınesi esime qaıta-qaıta oraldy. Bir kúni ony tabýdyń sebebi kenetten paıda boldy. Baspasózdi aqtaryp otyryp, bir gazettiń sýreti meni kúıdirip jibergendeı boldy: Astanada «Qazaqstan arýy» sulýlyq baıqaýy ótti, sol qyz (aty Ásel eken) Gran-prı aldy... Endi ony tabý qıyn bolmady.
Tanystyǵymyz ózara janashyrlyqqa, janashyrlyq jaqyndasýǵa ulasty. Birte-birte kezdese bastadyq. Áseldiń kelbetinen de, oı-pikirinen de men izdegen kóptegen qasıetterdi baıqadym. Eń bastysy, men jyldar boıy jalǵasyp kele jatqan psıhıkalyq jalǵyzdyqtan qutyldym.
Áńgimeni sozbaıyn. Musylmandyq salt boıynsha úılendik. Ásel maǵan eki bala – eki ul syılady. 2005 jyly Taýman, 2008 jyly Báıken dúnıege keldi.
Jastaıymnan tiregim bolǵan, eń qıyn synaq saǵattarynda qasymda bolǵan, úsh qyzymnyń anasy Saraǵa ómir boıy rızashylyqpen, qamqorlyqpen qaradym. Taǵdyrymnyń sol bir betburys sátinde de onyń meni túsinip, keshirgeni meni jubatty.
Taýman týǵannan keıin Almatyǵa kelip, odan keshirim surap, barlyǵyn baıandap berdim, qadirli áýlettiń ókili taǵy da tektilik tanytty. «Sábı – perishte. Bala baqytty bolsyn», – dedi Sara. Qyzdarym da meni durys túsindi.
Sondyqtan búginde shejirem bylaı jalǵasady: Qarasaı – Kóshek – Aıdar – Myrzataı – Keńbaba – Edil – Sapaqbaı – Nazarbaı – Ábish – Nursultan – Taýman, Báıken. Jáne áriqaraı.
Mine, dostar. Men bar shyndyqty aıttym. Buǵan ne aıtsańyzda, sizdiń sharýańyz. Bul – ómir.
Bir aqıqat bar. Júrekke ámir júrmeıdi», – delingen kitap úzindisinde.