Áleýmettik problemany, turmystyq jaǵdaıdy qazaq halqy birtutas bolyp jeńýi kerek. Mundaı pikirdi aqyn, memlekettik syılyqtyń laýreaty Nurlan Orazalın bildirdi, dep habarlaıdy almaty-akshamy.kz QazAqparatqa silteme jasap.
Aqynnyń aıtýynsha, qazir kózge kórinbeıtin, qolǵa ustalmaıtyn, qaterli bir qubylys bar. Onyń qaıdan kelip, kimniń aıtyp jatqany belgisiz.
«Biz óte kúrdeli, qıyn kezeńde ómir súrip jatqan urpaqpyz. Eger biz kishkentaı qate jiberetin bolsaq, ol erteńgi urpaqtyń aldynan úlken jaǵdaı bolyp shyǵady. Ult bolshaǵyna qaýipti bolmaq. Qazir kózge kórinbeıtin, qolǵa ustalmaıtyn, qaterli bir qubylys bar. Onyń qaıdan kelip, kimniń aıtyp jatqany belgisiz. Demokratıalyq qundylyqty ustaı alsaq jaqsy, eger ustaı almasaq ol bizdiń birinshi jaýymyzǵa aınalady»,- deıdi ol.
Nurlan Orazalın áleýmettik problemanyń bar ekenin aıtty.
«Árıne, áleýmettik qıyndyq, turmystyq problema bar. Ol qıyndyqty Qazaq memleketi ózi birtutas bolyp jeńý kerek. Ony bizge syrttan kelip eshkim rettep bermeıdi. Ár ult óz máselesin ózi sheshedi. Áleýmettik problema demokratıalyq jolmen, dıalogpen sheshilgen edi. Alaıda, alashtyń bas qalasy Almatyda júgensizdik, tártipsizdik oryn aldy. Bul ultty azǵyrý dep esepteımin. Men búgingi jastarǵa aıtarym bári aqylmen, parasattylyqpen sheshilýi kerek. Ata- babamyz amanattap ketken berekeni saqtaýymyz qajet»,-dedi Nurlan Orazalın.
Zıaly qaýym ókili, jastardy sabyrlyqqa shaqyrdy.
«Jastar besikte jatqan balasyn, úıdegi qazynaly qarıasyn oılaýy kerek, halqynyń bútindigin, eliniń tynyshtyǵyn, ult bolshaǵyn, memlekettiń erteńin oılaýy tıis. Mundaı jolmen eshqandaı másele sheshilmeıdi. Men jastardy sabyrlyqqa shaqyramyn»,- dedi ol.
Sonymen qatar, ol bılik máseleni beıbit jolmen sheshýge tyrysyp jatqanyn tilge tıek etti.
«Bılik máseleni sheshý úshin barlyq jaǵdaıdy qarap, sheshýge tyrysyp jatyr. Memleket basshysy halyqty berekege, aqylǵa shaqyrdy. Prezıdent úndeýine qulaq asýymyz kerek»,- dedi Nurlan Orazalın.