26 qazan kúni festıvál aıasynda «Astana-Tashkent» telekópiri ótedi
26-28 qazan aralyǵynda Astanada V Nobel festıvali ótedi, dep habarlaıdy Almaty-akshamy.kz.
Nobel festıvali - eń iri halyqaralyq komersıalyq emes tehnologıalyq jáne ǵylym-bilim baıqaýy. Mısıa Nobel Fest – jahandyq bilim men ǵylymdy álemniń kez kelgen buryshynda qoljetimdi etý. Oǵan jyl saıyn 14-ten astam Nobel syılyǵynyń laýreaty, 14 «Serpilis» syılyǵynyń ıegeri, álemdik ınnovatorlar, 155 elden 500 ýnıversıtet jáne 500 myńnan astam adam qatysady.
26 qazan kúni festıvál aıasynda «Astana-Tashkent» telekópiri ótedi. Telekópir barysynda bilim deńgeıi joǵary jáne tómen elderdegi áleýmettik-ekonomıkalyq aıyrmashylyqtar, sondaı-aq damýshy elderdegi bilim sapasyn jaqsartý máselelerin talqylaý josparlanýda.
Besinshi Nobel Fest bir mezgilde qazaq, aǵylshyn, túrik, qytaı, arab, ózbek jáne orys tilderinde 6 stýdıada - Ázirbaıjan, Germanıa, Túrkıa, Pákistan, Qytaı, Ózbekstan jáne Qazaqstanda ótedi.
Telekópir jumysyna QR Ǵylym jáne joǵary bilim mınıstri Saıasat Nurbek, 2017 jylǵy Nobel syılyǵynyń laýreaty Rae Kvong Chýng, CEO Nobel Fest negizin qalaýshy Maqsat Qurbenov, jastar agenttiginiń (Ózbekstan) dırektory Álisher Sadýllaev, COMSTECH, Islam yntymaqtastyǵy uıymynyń bas úılestirýshisi doktor Ikbal Choýdharı, Coca-Cola-nyń Eýrazıa men Taıaý Shyǵystaǵy vıse-prezıdenti Klaýdıa Navarro qatysady. Sonymen qatar elordaǵa 2007 jylǵy Nobel syılyǵynyń laýreaty, BUU Bas hatshysynyń Klımattyń ózgerýi jónindegi keńesshisi Rae Kvon Chýng keledi.
«Bul aýqymdy is-shara oflaın formatta uıymdastyrylmaq. Belgili spıkerler Astanada úsh kún boıy leksıa oqıdy. Tuńǵysh ret Qazaqstanda Klımattyq ekonomıka ortalyǵynyń ashylýy mańyzdy oqıǵalardyń biri bolmaq. Ortalyq óz esigin M.Áýezov atyndaǵy Ońtústik Qazaqstan ýnıversıtetinde ashady», - dedi V Nobel festıvali baǵdarlamasynyń jetekshisi Juldyz Adamzatova.
Aıta ketý kerek, Nobel Fest aıasynda 31 qazan men 4 qarasha aralyǵynda Nobel dárister aptalyǵy ótedi. Álemniń túkpir-túkpirinen kelgen Nobel syılyǵynyń laýreattary jáne álemdegi eń bedeldi marapattardyń ıegerleri ýnıversıtetter men stýdentter úshin dáris oqıdy. Dárister Nobel Fest bas seriktesteri – M.Áýezov atyndaǵy Ońtústik Qazaqstan ýnıversıteti men S.Seıfýllın atyndaǵy Qazaq agrotehnıkalyq ýnıversıteti úshin arnaıy uıymdastyrylady.