Muhtar Áýezov atyndaǵy Qazaq ulttyq drama teatrynyń sahnasynda klasık jazýshy Sh.Aıtmatovtyń «Kasandra tańbasy» fýtýrısik tragedıasynyń premerasy ótti.
Spektákl adamzattyń rýhsyzdaný máselesi otbasylyq qundylyqtardyń qadir-qasıetimen shendestirile kórsetiledi. Qoıylymda Fılofeı (kosmostyq monah) rólin Azat Seıtmetov somdady. Qoıylymda Fılofeı sharananyń qarsylyq belgisin ǵaryshtan zondaj sáýleler jiberý arqyly anyqtap, oǵan «Kasandra tańbasy» dep at beredi. Al osynaý jamandyqtarǵa qarsy turyp, adaldyqtyń aq týyn kótergen meıirimdi Rýnany Janar Janamanova oınady. Rejıser keıbir oqıǵany búgingi jaǵdaımen ushtastyrǵan, ózinshe oı-sheshimin usynǵan.
«Spektákldi sahnalaýǵa uzaq ýaqyt daıyndaldyq. Akterlik quramǵa alǵysymdy bildiremin. Qoıylymdy kópshilik túsine qoımaýy múmkin. Biz qoıylym arqyly adamdardyń bir-birine degen súıispenshiligin arttyrǵymyz keledi. Sondaı-aq, jasandy túsik tastaýdyń áserin, qaýipin jetkizgimiz keldi. Bolashaq urpaǵymyzdyń ómirine jaýapkershilikpen qarap, súıispenshilik tanytqanyn qalaımyz. Qoıylymnyń oıly-qyrly sátterin kórermen túsinistikpen qarap, bizdiń, jazýshynyń aıtqysy keletin oıyn túsinse deımiz», – deıdi rejıser Arıdash Ospanbaeva.
Nebir apattardyń bastaýy – teksizdik. Aıtmatov ósıeti búgin de asa ózekti ekendigin uǵyndyq. Osyndaı mańyzdy oıdy kóterip, shyǵarmanyń sújetin qurýda úlken qyzmet etip turǵan «jasandy jolmen adam ákelý» oqıǵasy — búgingi zaman shyndyǵymen betpe-bet kelgende týǵan sýretkerlik qıal nátıjesi. Sóıte tura, munyń negizinde ómirdiń shyndyq qubylystary jatqany da anyq.