Qyrǵyz, Túrikmenstan, Iran prezıdentteri qazaqstandyqtardy Naýryz meıramymen quttyqtady.
Naýryz merekesine oraı Qasym-Jomart Toqaevtyń atyna shet memleketterdiń basshylarynan, halyqaralyq uıymdardyń jetekshilerinen quttyqtaý jedelhattary áli de kelip túsip jatyr, dep habarlaıdy Almaty-akshamy.kz Aqorda saıtyna silteme jasap.
Qyrǵyz Respýblıkasynyń Prezıdenti Sadyr Japarov óz quttyqtaýynda ortaq muramyz ári jyl basy sanalatyn Naýryz meıramyn babalarymyzdyń izgi nıetpen jáne úlken úmitpen toılaǵanyn jazǵan.
«Kóktemniń osynaý merekesi baýyrlas eki halyqtyń damyp, órkendeýine aqjoltaı bolsyn. Qyrǵyzstan men Qazaqstan arasyndaǵy ortaq rýhanı qundylyqtarǵa, dostyqqa jáne strategıalyq seriktestikke negizdelgen kópjaqty qatynastardy odan ári damytý úshin Sizben yntymaqtastyqta jumys isteımiz dep úmittenemin», – delingen jedelhatta.
Túrikmenstan Prezıdenti Serdar Berdimuhamedov te Memleket basshysy men baýyrlas Qazaqstan halqyna óziniń quttyqtaýy men izgi tilegin joldady.
«Naýryz meıramy ejelden tabıǵattyń, tirshiliktiń qaıta túlep, kóktemniń kelgenin bildiredi. Bul mereke qonaqjaılyq, beıbitbishilik, tatý kórshilik jáne gýmanızmniń bıik qaǵıdattaryna negizdelgen dástúrdi ushtastyrady. Sondyqtan onyń halyqtar arasyndaǵy birlik pen dostyqty nyǵaıtýdaǵy mańyzy erekshe. Osynaý biregeı meıram Sizge, barsha Qazaqstan halqyna qýanysh, amandyq, baq-bereke ákelsin», – dep jazǵan Túrikmenstan Prezıdenti.
Iran Islam Respýblıkasynyń Prezıdenti Ibrahım Raısı quttyqtaý jedelhatynda Naýryz meıramy azamattarymyzdyń júrekterine qýanysh syılap, aımaqtaǵy barlyq halyqqa beıbitshilik pen yntymaq alyp kelsin dep júrekjardy tilegin jazǵan.
«Iran Islam Respýblıkasy osy mádenı yntymaqtastyqty, beıbitshilik pen tynyshtyqty búkil álemge jaıý jáne nyǵaıtý isin qoldaıdy. Sondaı-aq bul maqsatqa qol jetkizý úshin barlyq elge dostyq qolyn sozýǵa daıyn», – delingen Iran Prezıdentiniń jedelhatynda.
Sonymen qatar ózderiniń quttyqtaý jedelhattaryn Túrki memleketteri uıymy Aqsaqaldar keńesiniń tóraǵasy Bınalı Iyldyrym, Túrkitildes elderi Parlamenttik Assambleıasynyń Bas hatshysy Mehmet Sýreıa Er, TÚRİKSOI-dyń bas hatshysy Dúısen Qaseıinov, Eýrazıalyq ekonomıkalyq komısıa Alqasynyń tóraǵasy Mıhaıl Másnıkovıch, Ujymdyq qaýipsizdik týraly shart uıymynyń Bas hatshysy Stanıslav Zas, Eýropadaǵy qaýipsizdik jáne yntymaqtastyq uıymynyń Az ulttar isteri jónindegi joǵarǵy komısary Qaırat Abdrahmanov, Azıadaǵy ózara is-qımyl jáne senim sharalary jónindegi keńes Hatshylyǵynyń atqarýshy dırektory Qaırat Sarybaı, Tatarstan Prezıdenti Rýstam Mınnıhanov jáne basqalar joldady.