Qarýly kúshterdegi áskerı bólimderde jas sarbazdar Otan aldynda adal qyzmet etýge ant berdi, dep habarlaıdy Almaty-akshamy.kz Inform.kz-ke silteme jasap.
Áýe shabýylyna qarsy qorǵanys áskerlerinde ant berý rásimi olardyń qurylǵanyna 30 jyl tolýymen tuspa-tus keldi. Jalpy, áskerı daıyndyq kýrsynan jáne ant qabyldaǵannan keıin jas býyn eldiń áýe shepterin qorǵaýǵa qajetti áskerı-eseptik mamandyqtardy ıgerýge kirisedi. Sondaı-aq, Ulttyq qorǵanys ýnıversıtetiniń biregeı bólimsheleriniń biri bolyp sanalatyn áskerı-ǵylymı vzvodynyń merzimdi qyzmettegi áskerı qyzmetshileri de Otanǵa adal bolýǵa ant berdi. Olardyń negizgi mindeti – ınjenerlik-tehnıkalyq beıindegi, İT tehnologıalar men kıberqaýipsizdik baǵyttary boıynsha ǵylymı jumys atqarý.
Áskerı-ǵylymı vzvodtyń áskerı qyzmetshileri ózderiniń kúndelikti qyzmetinde jaýyngerlik daıarlyqtyń negizgi pánderin ıgerýden basqa Qarýly kúshterdiń ıgiligi úshin ǵylymı-zertteý, tájirıbelik-konstrýktorlyq jáne synaq jumystaryn oryndaýǵa tartylady.
«Elimizdiń jetekshi áskerı joǵary oqý orny – Ulttyq qorǵanys ýnıversıtetine qyzmet etýge kelgenimdi maqtan tutamyn jáne Otan aldyndaǵy konstıtýsıalyq paryzymdy laıyqty oryndaý úshin bar kúsh-jigerimdi salamyn. Bul úshin meniń áskerge barar aldynda alǵan ǵylymı-tehnıkalyq baǵyttaǵy tájirıbem men bilimim bar», – deıdi qatardaǵy jaýynger Artem Egorov.
Saltanatty is-sharalarǵa Qarýly kúshterdiń ardagerleri, ınternasıonalıs-jaýyngerler, sarbazdardyń týǵan-týystary qatysty. Ant qabyldaǵannan keıin dástúr boıynsha bólimshe komandırleri ata-analarmen áńgimelesti. Qyzyqtyrǵan suraqtaryna jaýap berip, olardy áskerı bólimderdiń ınfraqurylymymen tanystyrdy, kazarmalar, asqanalar men oqý synyptaryn kórsetti.