– Biz óz tańdaýymyzdy jasadyq. Dálirek aıtqanda, ózimiz tirkelgen jerimiz boıynsha №157 saılaý ýchaskesinde daýys berdik. Qazaq eliniń tizginin ustar aıbyndy, otanshyl rýhtaǵy azamatqa daýsymyzdy berdik. Osy sátti paıdalanyp aıtarym, memleket basqaratyn adamnyń boıynan birneshe qasıet jáne aıryqsha minezderdi kórgimiz keledi. Elimizdiń jańadan saılanatyn basshysy halyqtyń áleýmettik-ekonomıkalyq ál-aýqatynyń artýyna óz úlesin qosyp, túıtkilderdi tarqatady degen nıettemiz.
Aýyldardan kelgen qarakózderimiz alyp shaharlarda tirlik qylýda. Kóbisi qıyrdaǵy, qıandaǵy aýyldyń azamattary men azamatshalary. Sonymen qatar baspana máselesi sheshimin taýyp, aldaǵy ýaqytta jas otbasylar úıli-jaıly bolady degen úmittemiz. Taǵy bir qosa aıtatyn dúnıe bar. Ol, álbette – jumyssyzdyq. Ózderińiz kórip otyrǵandaı, prezıdent bolý ońaı sharýa emes. Osynshama qyrýar tirlik aldaǵy saılanatyn memleket basshysynyń moınyna artylaıyn dep tur. Sońǵy ýaqytta elimiz eńsesin túzeı bastady. Bári birden ornaı qalmas. Dese de, alǵa umtyla bergen abzal. Óıtkeni Otanymyz, memleketimiz, keń baıtaq jerimiz bárimizge ortaq, aǵaıyn!
Bolashaqqa senim mol!