Ótken jyly áleýmettik mańyzy bar qalalyq avtobýs marshrýttaryn sýbsıdıalaýǵa shamamen 216 mlrd teńge bólinse, bıyl bul maqsatta 242 mlrd teńge bólý josparlanyp otyr
Búgin QR Kólik mınıstrliginiń basshysy Marat Qarabaevtyń tóraǵalyǵymen mınıstrlik ǵımaratynda jolaýshylardy qoǵamdyq kólikpen tasymaldaý máseleleri boıynsha keńes ótti, dep habarlaıdy Almaty-akshamy.kz Kólik mınıstrligine silteme jasap.
Ashyq talqylaý formatynda ótken otyrys barysynda qalalyq marshrýttardy sýbsıdıalaý, avtobýs parkin jańartý, tarıftik komısıalardyń jumysy jáne tarıfterdi belgileý, elektrondyq bıletteý júıesine qatysty máseleler qarastyryldy. Kezdesýge mınıstrliktiń, ortalyq memlekettik jáne jergilikti atqarýshy organdardyń, úkimettik emes uıymdar, zańdy tulǵalar birlestigi, Ónerkásipti damytý qorynyń ókilderi, avtobýs shyǵaratyn zaýyttar men tasymaldaýshylar qatysty.
Kezdesý barysynda avtobýs júrgizýshileriniń tapshylyǵy máselesine de qatysty suraqtar talqylandy. Máselen, Aqmola oblysynda jolaýshylardy tasymaldaýǵa negizinen zeınet jasyna jetken júrgizýshiler tartylǵan eken. Osyǵan uqsas másele eldiń barlyq derlik aımaqtarynda bar. Tasymaldaýshylar D sanatyndaǵy júrgizýshi kýáligin alý úshin jas shegin tómendetýdi, sondaı-aq júrgizýshiden qoǵamdyq kólikti basqarýǵa ruqsat bermes buryn shaǵyn avtobýsta 3 jyldyq tájirıbesiniń bolýyn talap etetin normany alyp tastaýdy suraıdy.
Sóz kezeginde keńeske qatysýshylar vedomstvo basshysyna ózekti máselelerdi sheshý barysynda uıymdastyrylǵan ashyq áńgime úshin rızashylyqtaryn bildirdi. Keńesti qorytyndylaı kele, Marat Kárimjanuly kelip túsken usynystardy taǵy bir márte pysyqtaýdy surap, atalǵan máseleler aldaǵy ýaqytta jiti zerdelenetinin aıtyp jetkizdi. İs-sharaǵa qatysýshylar bıyl aqpan aıynyń sońynda qaıta kezdesý týraly ýaǵdalasty.