QR Mádenıet jáne sport mınıstri Aqtoty Raıymqulova Facebook-tegi paraqshasynda otandastaryn Qazaqstan Respýblıkasynyń sport kúni merekesimen quttyqtady, dep habarlaıdy Almaty-akshamy.kz.
«Qurmetti dostar! Ardaqty aǵaıyn! Sizderdi tamyzdyń úshinshi jeksenbisi Qazaqstan Respýblıkasynyń sport kúni merekesimen izgi nıetpen quttyqtaımyn! Bul mereke elimizde 2003 jyly 15 qarashadaǵy Tuńǵysh Prezıdent – Elbasy Nursultan Nazarbaevtyń Jarlyǵyna sáıkes atap ótilýde. Sport – densaýlyq kepili. Kemesin alysqa baǵyttap bara jatqan memleketimiz bul baılyqty kózdiń qarashyǵyndaı saqtap, nyǵaıtýǵa shekarasyn shegendegen kezden bastap erekshe zeıin qoıyp keledi. El turǵyndarynyń arasynda salaýatty ómir saltyn nasıhattap, buqaralyq sportqa degen qyzyǵýshylyǵyn arttyrý – memleketimizdiń strategıalyq basym baǵytynyń biri», - dedi mınıstr.
Mınıstrdiń sózinshe, Mádenıet jáne sport mınıstrligi buqaralyq sportty damytý maqsatynda birqatar baǵdarlamany qolǵa alyp, arnaıy zań jobalaryna tıisti ózgerister engizip jatyr.
«Biz densaýlyqtyń qadirin jete túsinip, ony basty baılyqqa balaǵan halyqtyń urpaǵymyz. Búginde «shynyqsań – shymyr bolasyń», degen ónegeli sózdi este ustap, sportty kúndelikti ómiriniń ajyramas bir bóligine aınaldyryp úlgergen azamattarymyzdyń qatary artyp kele jatqany qýantady. Mádenıet jáne sport mınıstrligi buqaralyq sportty damytý maqsatynda birqatar baǵdarlamany qolǵa alyp, arnaıy zań jobalaryna tıisti ózgerister engizip jatyr. Búgingi sátti paıdalana otyryp, bárińizdi sport atty sıqyrdyń sońynan erip, álemdik qozǵalystyń qataryna qosylýǵa shaqyrǵym keledi. Dúbirli dodalarda el namysyn qorǵaıtyn kásipqoı sportshylarymyzǵa muqalmas erik-jiger men taýsylmas kúsh-qýat tileımin. Laıym otandastarymyzdyń asyǵy alshysynan túsip, kók týymyz bıikte jelbireı bersin. Árdaıym halqymyzdyń deni saý, oıy sergek bolsyn!», - dedi Raıymqulova.