Ó.Joldasbekov atyndaǵy Stýdentter saraıynda Táýelsizdiktiń 30 jyldyǵyna arnalǵan saltanatty jıyn ótti.
Merekelik jıynǵa memleket jáne qoǵam qaıratkerleri, zıaly qaýym ókilderi, ýnıversıtet ujymy men oqý ordasynyń ár jyldardaǵy túlekteri qatysty.
Osynaý tabysqa toly 30 jyl ishindegi eńseli elimizdiń erlikke toly eńbek joly men qol jetkizgen jetistikteri týraly ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektor Janseıit Túımebaev jan-jaqty baıandady.
– Táýelsizdik toıy – bul mereıli mereke ǵana emes, ótkendi saralaıtyn, bolashaqty josparlaıtyn syndarly kezeń. Egemendi el bolǵan elimiz jańa órkenıetke bet burdy. Elimizde ulttar tutastyǵy men birligi nyǵaıyp, jahandyq beıbitshilikti saqtaýǵa úles qosty. Qazaqstan Túrki áleminiń ortalyǵyna aınalyp, álemdik keńistikten oryn aldy. Osynaý tarıhı jetistikterdiń barlyq bastaýynda Qazaqstannyń Tuńǵysh Prezıdenti – Elbasymyz Nursultan Nazarbaevtyń ólsheýsiz eńbegi tur, – degen oqý ordasynyń basshysy Elbasynyń Qazaqstan memleketiniń qalyptasýyndaǵy erekshe eńbegin aıryqsha atap kórsetti.
Sonymen qatar, oqý ordasynyń jastar tárbıesine erekshe nazar aýdaryp, mán berip otyrǵanyn jetkizdi. Táýelsizdigimizdi qasterleý turǵysynda atqarylyp jatqan jumystarǵa toqtalyp, Elbasy saıabaǵy men Ǵalymdar baǵy ashylǵanyn, aıtýly tulǵalardyń dáris oqýy turaqty úrdiske aınalǵanyn mysal etti.
Mereke aıasynda oqytýshy profesorlar men úzdik qyzmetkerler «Ál-Farabı atyndaǵy QazUÝ-ǵa sińirgen eren eńbegi úshin» medalimen jáne rektordyń Qurmet gramotalarymen marapattaldy.
Jıyn sońynda «Táýelsizdik – bárinen qymbat» atty onkúndik qorytyndylanyp, qonaqtar kitap jáne fotokórmeni tamashalady.