Qazaq tilindegi suhbattyń óz aýdıtorıasy bar.
Memlekettiń máselesin memlekettik tilde aıtýymyz kerek. Bul týraly «Qazaqstan» telearnasyna suhbat bergen QR Prezıdenti Qasym-Jomart Toqaev aıtty, dep habarlaıdy Almaty-akshamy.kz.
Suhbat barysynda telearna tilshisi Memleket basshysynyń alǵashqy suhbaty orys tilinde bolǵanyn aıta kele, munyń qazaq tilin kemsitý emes pe dep surady.
«Bul eshqandaı kemsitý emes. Eshqandaı mensinbeýshilik te emes dep aıtýǵa bolady. Kóptegen arna osyǵan deıin menen birneshe ret suhbat berýdi suraǵan. Men olardyń eshqaısysyna kelisken joqpyn. Keıin tek «Habar» arnasyna ǵana suhbat beremin dep sheshtim. Sebebi el ishinde kóptegen jalǵan aqparat tarap jatty. Solarǵa toqtaý salý kerek boldy. Ol suhbat eń aldymen álem jurtshylyǵyna Qazaqstandaǵy ahýal jóninde shynaıy aqparat berý úshin jasaldy. Sodan keıin sheteldik aqparat quraldary suhbatymdy keńinen taratyp, barynsha paıdalandy. Qalaı bolsa da, orys tili - Birikken Ulttar Uıymynyń 6 resmı tiliniń biri. Ony moıyndaýymyz kerek. Al qazaq tilindegi suhbattyń óz aýdıtorıasy bar. Jalpy, memlekettiń máselesin memlekettik tilde aıtýymyz kerek. Tilimiz bizden basqa eshkimge keregi joq. Sondyqtan eń aldymen ózimiz oǵan qurmet kórsetýimiz kerek dep oılaımyn» – dedi Qasym-Jomart Toqaev.